ជាធម្មតា យន្តហោះអាចត្រូវបង្ខំចិត្តហោះបកត្រឡប់ក្រោយវិញដោយហេតុផលមួយចំនួនដូចជា មានបញ្ហាម៉ាស៊ីន អាកាសធាតុអាក្រក់ ឬក៏អ្នកដំណើរអុកឡុកជាដើម។ យ៉ាងណាមិញ យន្តហោះរបស់ United Airlines មួយគ្រឿង លេខ UA198 ហោះចេញពីក្រុង Los Angeles ទៅក្រុងសៀងហៃ កាលពីថ្ងៃទី ២២ ខែមីនា ឆ្នាំ ២០២៥ កន្លងទៅ បែរជាត្រូវបង្ខំចិត្តបកក្បាលត្រឡប់ក្រោយ ក៏ព្រោះតែមានពីឡុតម្នាក់ភ្លេចលិខិតឆ្លងដែន (passport) នៅផ្ទះ។
យន្តហោះ Boeing 787-9 បានហោះចេញពីព្រលាននៅក្រុង Los Angeles វេលាម៉ោង ២ និង ០១ នាទីរសៀលថ្ងៃទី ២២ ខែមីនា (ពេលវេលាក្នុងតំបន់) ដោយគ្រោងនឹងធ្វើការចុះចតដល់គោលដៅនៅក្រុងសៀងហៃវេលាម៉ោង ៦ និង ៣៥ នាទីយប់ ថ្ងៃទី ២៣ ខែមីនា ឆ្នាំ ២០២៥។ ក្រោយហោះហើរបានរយៈពេលជិត ២ ម៉ោង ស្រាប់តែយន្តហោះត្រូវបកក្បាលត្រឡប់ទៅសហរដ្ឋអាមេរិកវិញ ដោយចុះចតនៅ San Francisco ពេលដែលមានពីឡុតម្នាក់ភ្ញាក់ខ្លួនព្រើតថាលោកបានភ្លេចយកលិខិតឆ្លងដែនមកតាមខ្លួន។
ខាងក្រុមហ៊ុនជើងហោះហើរបានផ្ដល់ព័ត៌មានដល់អ្នកដំណើររបស់ខ្លួនថា៖ «ជើងហោះហើររបស់អ្នកទាំងអស់គ្នាត្រូវបានបកត្រឡប់ទៅ San Francisco វិញ ដោយសារតែមានបញ្ហាភ្លាមៗមួយពាក់ព័ន្ធក្រុមការងាររបស់យើងម្នាក់ ដោយតម្រូវឱ្យប្ដូរក្រុមការងារថ្មី។ ពេលដែលពួកគេទៅដល់ ពួកយើងនឹងនាំអ្នកទាំងអស់គ្នាទៅសៀងហៃឱ្យរហ័សតាមដែលអាចធ្វើបាន។ ពួកយើងពិតជាសុំអភ័យទោសមែនទែនចំពោះការរអាក់រអួលនេះ ហើយក៏អរគុណចំពោះការអត់ធ្មត់របស់អ្នកទាំងអស់គ្នា»។
គួរឱ្យដឹងផងដែរថា អ្នកដំណើរលើយន្តហោះនោះទាំងអស់ក៏ត្រូវបានខាងក្រុមហ៊ុនផ្ដល់ vouchers អាហារចំនួន ១៥ ដុល្លារផងដែរជាសុំទោសចំពោះបញ្ហាដែលបានកើតឡើង។ ចុងក្រោយ យន្តហោះក៏បានដឹកអ្នកដំណើរទៅដល់គោលដៅ គ្រាន់តែត្រូវយឺតពេលវេលាកំណត់ទុក ៦ ម៉ោង៕
ប្រភព៖ Kenh14
