ថ្មីណាស់! ស្ត្រីម្នាក់ដាក់ពាក្យប្ដឹងប្ដីខ្លួនឯងឡើងតុលាការ ព្រោះស្រឡាញ់ថ្នាក់ថ្នមឆ្មាខ្លាំងជាងប្រពន្ធ

សារព័ត៌មាន Oddity Central បានចេញផ្សាយករណីដ៏ចម្លែកហួសចិត្តមួយដែលមានស្ត្រីម្នាក់នៅក្រុង Bengaluru រដ្ឋ Karnataka ប្រទេសឥណ្ឌា ដោយរូបនាងបានធ្វើការដាក់ពាក្យប្ដឹងទៅតុលាការជុំវិញការមិនសុខចិត្តរឿងប្ដីស្រឡាញ់យកចិត្តទុកដាក់នឹងសត្វឆ្មាជាជាងរូបនាង។

តាមការបញ្ជាក់ពីលោកចៅក្រម M. Nagaprasanna បានឱ្យដឹងថា ករណីមួយនេះគឺគ្មានរកឃើញការប្រើប្រាស់ហិង្សា ឬរំលោភបំពានអ្វីនោះឡើយ ប៉ុន្តែអ្វីដែលដើមបណ្ដឹងផ្ដោតសំខាន់នោះគឺតែលើរឿងប្ដីរបស់នាងមើលថែឆ្មាចិញ្ចឹមជាងប្រពន្ធ ដែលនាំឱ្យពួកគេទាំងពីរកើតមានទំនាស់ពាក្យសម្ដីជាមួយគ្នាជាញឹកញាប់។

តាមសម្ដីដើមបណ្ដឹងជាប្រពន្ធបានលើកឡើងថា រាល់ពេលដែលនាងនិយាយប្រាប់ប្ដីពីទង្វើរបស់គេស្រឡាញ់ឆ្មាជាងនាង ពួកគេតែងតែឈ្លោះគ្នា។ បន្ថែមពីនេះ នាងក៏បាននិយាយទៀតថាសត្វឆ្មានោះគឺតែងវាយប្រហារ និង ខ្វាចនាងជាច្រើនលើក តែប្ដីរបស់នាងគឺមិនដែលខឹង ឬមានសកម្មភាពអ្វីទៅលើឆ្មានោះឡើយ។

ជុំវិញករណីមួយនេះ ចៅក្រម Nagaprasanna បានរៀបរាប់ដែរថា៖ «ពាក្យបណ្ដឹងគឺដាក់មកផ្ដោតទៅលើបញ្ហារៀបការ និង ការរួមរស់ជាមួយគ្នា ប៉ុន្តែចំណុចម្បងនៃករណីនេះគឺការឈ្លោះទាស់ទែងគ្នាដោយសារឆ្មាក្នុងផ្ទះ។ រាល់ពេលភាគីខាងប្រពន្ធលើករឿងឆ្មាមកនិយាយ គឺប្ដីប្រពន្ធពួកគេតែងតែឈ្លោះគ្នាហើយ»។ ករណីបណ្ដឹងដ៏ហួសចិត្តនេះដែរ ខាងតុលាការគឺមិនបានទៅស៊ើបអង្កេតលើខាងបុរសជាស្វាមីនោះឡើយ ដោយផ្ទុយទៅវិញតុលាការបានស្ដីបន្ទោសទៅដើមបណ្ដឹងជាប្រពន្ធដែលនឹកឃើញមកដាក់ពាក្យប្ដឹងលើករណីបែបនេះ៕