កាលពីវេលាម៉ោង ៥ និង ៥១ នាទីព្រឹមព្រលឹមថ្ងៃទី ០៨ ខែមេសា ឆ្នាំ ២០២៥ នេះ (ពេលវេលាក្នុងតំបន់) ភ្នំភ្លើង Kanlaon ដែលជាភ្នំភ្លើងសកម្មមួយនៅភាគកណ្ដាលប្រទេសហ្វីលីពីន បានផ្ទុះឡើងជះផ្សែង និង ផេះយ៉ាងខ្មួលខ្មាញ់ឡើងលើអាកាសក្នុងកម្ពស់ដល់ទៅ ៤ ពាន់ម៉ែត្រ នេះបើតាមសេចក្ដីប្រកាសពីខាងវិទ្យាស្ថានផ្នែកបន្ទុះភ្នំភ្លើង និង រញ្ជួយដីប្រចាំប្រទេសហ្វីលីពីន។
លោក John De Asis មន្ត្រីផ្នែកសង្គ្រោះប្រចាំក្រុង La Castellana ដែលជាទីក្រុងមួយនៃខេត្ត Negros Occidental នៅជើងភ្នំភ្លើងនោះ បានបញ្ជាក់ដែរថាខាងអាជ្ញាធរបានត្រៀមខ្លួនរួចរាល់ហើយសម្រាប់គ្រោះធម្មជាតិមួយនេះ។ ថ្លែងប្រាប់សារព័ត៌មាន AFP លោក De Asis បានរៀបរាប់ថា៖ «ផ្ទះសម្បែងពលរដ្ឋដែលនៅចន្លោះពី ៤ ទៅ ៦ គីឡូម៉ែត្រពីភ្នំភ្លើងត្រូវបានជម្លៀសចេញតាំងពីការផ្ទុះកាលពីខែធ្នូ ឆ្នាំ ២០២៤ មកម្ល៉េះ។ ឥលូវនេះ ពួកយើងគ្រាន់តែតាមដានពិនិត្យមើលថាតើភូមិណាបានរងការប៉ះពាល់ដោយផេះនៃភ្នំភ្លើងផ្ទុះនោះប៉ុណ្ណោះ»។
កម្រិតប្រកាសអាសន្ននៅតែបន្តស្ថិតក្នុងកម្រិតទី ៣ ដដែលតាំងពីចុងឆ្នាំ ២០២៤ មក ហើយបើតាមលោក De Asis ដដែលបានឱ្យដឹងទៀតថា ខាងមន្ត្រីក្នុងតំបន់បានណែនាំឱ្យបណ្ដាសាលា និង ការិយាល័យនានាក្នុងខេត្ត La Castellana បិទជាបណ្ដោះអាសន្នសិន។
ភ្នំ Kanlaon គឺជាភ្នំភ្លើងមួយក្នុងចំណោមភ្នំភ្លើងដ៏សកម្មចំនួន ២៤ នៅក្នុងប្រទេសហ្វីលីពីន។ ជាក់ស្ដែង កាលពីខែកញ្ញា ឆ្នាំ ២០២៤ កន្លងទៅ មនុស្សរាប់រយនាក់ដែលរស់នៅក្បែរភ្នំភ្លើងនោះត្រូវបានជម្លៀសចេញទៅកន្លែងមានសុវត្ថិភាពជាបន្ទាន់ ក្រោយភ្នំភ្លើងនោះផ្ទុះជះឧស្ម័នពុលរាប់ពាន់តោនក្នុងពេលត្រឹមតែមួយថ្ងៃ៕
