ជារឿងដ៏ភ្ញាក់ផ្អើលមួយនៅក្នុងប្រទេសជប៉ុន ដោយតារាសម្ដែងស្រី Ryoko Hirosue ត្រូវបានប៉ូលិសចាប់ខ្លួន ក្រោយរូបនាងបានប្រើប្រាស់ហិង្សាលើគ្រូពេទ្យស្រីម្នាក់នៅក្នុងមន្ទីរពេទ្យមួយកន្លែង។
តាមសារព័ត៌មាន ANNnewsCH និង TBS News បានឱ្យដឹងថា កាលពីយប់ថ្ងៃទី ០៧ ខែមេសា ឆ្នាំ ២០២៥ កន្លងទៅ (ពេលវេលាក្នុងតំបន់) តារាស្រី Ryoko Hirosue បានបើកឡាននៅតាមដងផ្លូវហើយក៏ជួបគ្រោះថ្នាក់ចរាចរណ៍ប៉ះគ្នាជាមួយឡានត្រាក់ទ័រមួយគ្រឿង។ នាង និង បុរសក្នុងឡានត្រូវបានបញ្ជូនទៅមន្ទីរពេទ្យនៅខេត្ត Shizuoka ដើម្បីពិនិត្យមើលរបួសស្នាម។ ជាសំណាងល្អ ទាំងនាង និង បុរសរូបនោះគឺមិនមានរងរបួសអ្វីនោះឡើយ តែយ៉ាងណាមិញ ខណៈនៅក្នុងមន្ទីរពេទ្យនោះ Ryoko Hirosue គឺបានប្រើប្រាស់ហិង្សាដោយធាក់ និង ខ្វាចពេទ្យស្រីម្នាក់ បណ្ដាលឱ្យរងរបួសស្រាល។
ក្នុងពេលជាមួយគ្នានោះ ប៉ូលិសក៏បាននៅក្នុងមន្ទីរពេទ្យដើម្បីកត់ត្រាសួរនាំរឿងគ្រោះថ្នាក់ចរាចរណ៍ ហើយក៏បានឃាត់ខ្លួន Ryoko Hirosue ពីបទបំពានលើអ្នកដទៃ។ រឿងអាស្រូវរបស់ Ryoko បានផ្ទុះការវែកញែកពាសពេញបណ្ដាញសង្គមរហូតក្លាយជាប្រធានបទ top trending លើបណ្ដាញសង្គម X នៅជប៉ុន និង បណ្ដាញសង្គម Weibo នៅក្នុងប្រទេសចិន។
ដោយឡែក មកដល់ព្រឹកថ្ងៃទី ០៨ ខែមេសា ឆ្នាំ ២០២៥ នេះ ខាងអ្នកតំណាងឱ្យក្រុមហ៊ុនរបស់ Ryoko បានចេញមកបកស្រាយថា តារាសម្ដែងស្រីខាងលើគឺមានភាពភ័យខ្លាច និង មានបញ្ហាប៉ះពាល់ផ្លូវអារម្មណ៍អំឡុងពេលពិនិត្យសុខភាព ទើបបណ្ដាលឱ្យនាងកើតមានទង្វើមិនសមរម្យធ្វើឱ្យបុគ្គលិកពេទ្យរងរបួសបែបនេះ៕
