ឆ្កែប៉ូលិសពូជ Corgi ដំបូងគេបង្អស់ក្នុងប្រទេសចិន ត្រូវបានដាច់រង្វាន់ bonus ចុងឆ្នាំ ក្រោយវាដេកក្នុងម៉ោងបំពេញការងារ និង នោមដាក់ចានបាយខ្លួនឯង កំពុងធ្វើឱ្យមហាជនអ្នកលេងបណ្ដាញសង្គមជាច្រើនកំពុងប្រទេសចិនផ្ទុះសំណើចរួមជាមួយការក្នាញ់ជាខ្លាំង។
ឆ្កែប៉ូលិសពូជ Corgi ខាងលើនេះដែរមានឈ្មោះថា Fuzai បានកើតកាលពីថ្ងៃទី ២៨ ខែសីហា ឆ្នាំ ២០២៣ កន្លងទៅ ដោយក្រោយមកវាត្រូវបានចូលហ្វឹកហ្វឺនជាឆ្កែប៉ូលិសនៅមូលដ្ឋានក្រុង Weifang ខេត្ត Shandong ប្រទេសចិន។ មកដល់ខែមករា ឆ្នាំ ២០២៤ ក្នុងវ័យទើបបាន ៤ ខែ Fuzai បានចាប់ផ្ដើមការងាររបស់ខ្លួនដំបូងក្នុងការចុះប្រតិបត្តិការរុករកគ្រឿងផ្ទុះ រហូតមកដល់ខែមីនាក្នុងឆ្នាំដដែល Fuzai ក៏បានក្លាយជាតារាលើអ៊ីនធឺណែត ក្រោយរូបភាពដ៏គួរឱ្យក្នាញ់ ដៃជើងខ្លីៗ រួមជាមួយជំនាញរុករកគ្រឿងផ្ទុះរបស់វាត្រូវបានចែកចាយទៅនោះ។
ក្នុងខែតុលា ឆ្នាំ ២០២៤ Fuzai បានបញ្ចប់ថ្នាក់ហ្វឹកហ្វឺន ហើយបានក្លាយជាឆ្កែប៉ូលិសពេញសិទ្ធិ ហើយរឿងរ៉ាវរបស់ Fuzai ត្រូវបានចែកចាយជានិច្ចលើគណនីបណ្ដាញសង្គមមួយឈ្មោះថា Corgi Police Dog Fuzai and Its Comrades ដោយគណនីមួយនេះត្រូវបានកាន់ដោយការិយាល័យសន្តិសុខសាធារណៈ Weifang។
អ្វីដែលធ្វើឱ្យមហាជនចាប់អារម្មណ៍ និង អស់សំណើចញញឹកបិទមាត់មិនជិតនោះ គឺមានវីដេអូមួយបង្ហោះកាលពីថ្ងៃទី ១៩ ខែមករា ឆ្នាំ ២០២៥ កន្លងទៅ ដោយវីដេអូនោះទម្លាយថា Fuzai បានបំពេញការងារបានល្អក្នុងឆ្នាំ ២០២៤ ដោយវាបានបំពេញបេសកកម្មសន្តិសុខបានច្រើន និង ថែមទាំងលើកមុខមាត់ក្រុមឆ្កែប៉ូលិស Weifang ទៀតផង។ ជាមួយសមិទ្ធផលទាំងនេះ សត្វឆ្កែ Corgi មួយនេះក៏ទទួលបានរង្វាន់ជាផ្កាពណ៌ក្រហម ចំណីអាហារ ក៏ដូចជាតុក្កតាមួយចំនួនផងដែរ។
យ៉ាងណាមិញ អមជាមួយការសរសើរនោះ ប៉ូលិសប្រុសដែលផ្ដល់រង្វាន់ឱ្យ Fuzai ក៏បានសង្កត់បញ្ជាក់ថា៖ «ប៉ុន្តែព្រោះតែអត្តចរិតរបស់ឯងប៉ុន្មានថ្ងៃនេះ មើលទៅដូចល្វើយនៅកន្លែងការងារ និង ថែមទាំងនោមដាក់ចានបាយខ្លួនឯងទៀតនោះ ពួកយើងត្រូវតែរិះគន់ឯង និង ដកហូតចំណីទុកជាការពិន័យ។ យើងនឹងទុករង្វាន់សល់ត្រឹមតែផ្កាក្រហមតែប៉ុណ្ណោះ»។
គួរបញ្ជាក់ដែរថា ដើម្បីធានាជូនសាធារណជនកុំឱ្យបារម្ភថា Fuzai ដាច់ពោះ ខាងគណនីខាងលើក៏ធ្វើការបង្ហោះតាមក្រោយបញ្ជាក់ថា ទោះចំណីជា bonus ចុងឆ្នាំរបស់ Fuzai ត្រូវបានដកហូតវិញក៏ពិតមែន ប៉ុន្តែវានៅតែទទួលបានកញ្ចប់រង្វាន់ចូលឆ្នាំចិនដដែល៕
ប្រភព៖ SCMP
