ក្រោយទទួលសមិទ្ធផលលើកដំបូងពីការព្រមព្រៀងបទឈប់បាញ់ចាប់ពីយប់រំលងអាធ្រាត្រឈានចូលថ្ងៃទី ២៩ ខែកក្កដា ឆ្នាំ ២០២៥ នេះ សម្តេចមហាសេនាបតី តេជោ ហ៊ុន សែន ក៏បានចេញការបង្ហោះអរគុណទៅដល់លោកប្រធានាធិបតីសហរដ្ឋអាមេរិក ដូណាល់ ត្រាំ ដែលបានផ្ដួចផ្ដើមគំនិតដ៏ប្រពៃជួយសង្គ្រោះជីវិតមនុស្សរាប់ពាន់ម៉ឺននាក់ពីសង្គ្រាមកម្ពុជា និង ថៃ។
ជាមួយគ្នានោះដែរ សម្តេចក៏បានអរគុណដល់នាយករដ្ឋមន្ត្រីប្រទេសម៉ាឡេស៊ី និង មិត្តចិន ក៏ដូចជាបណ្ដាប្រទេសជាមិត្តទាំងអស់ដែលបានគាំទ្រនូវកិច្ចព្រមព្រៀងបទឈប់បាញ់នេះ។ ជាចុងក្រោយ សម្តេចក៏បានអរគុណដល់ប្រជាជនកម្ពុជា និង ថៃ កងទ័ពកម្ពុជា និង ថៃ ដែលបានគាំទ្រដំណើរការសន្តិភាពមួយនេះ។
សារទាំងស្រុងរបស់សម្តេចមហាសេនាបតីតេជោ ហ៊ុន សែន បានបង្ហោះរៀបរាប់ថា៖ «សមិទ្ធផលនៃគំនិតផ្តួចផ្តើមដ៏ប្រពៃរបស់ ឯកឧត្តម ដូណាល់ ត្រាំ បានសង្រ្គោះជីវិតមនុស្សរាប់ពាន់ម៉ឺននាក់ពីសង្រ្គាមកម្ពុជានិងថៃ។
ជាដំបូងខ្ញុំសូមអរគុណចំពោះ ឯកឧត្តមប្រធានាធិបតី ដូណាល់ ត្រាំ ដែលបានផ្តួចផ្តើមគំនិតដ៏ប្រពៃបង្កើតឱ្យមានបទឈប់បាញ់ និងសន្តិភាពរវាង កម្ពុជា និងថៃ ដែលគំនិតនេះគឺជាសមិទ្ធផលដ៏អស្ចារ្យបានជួយសង្រ្គោះជីវិតមនុស្សយ៉ាងច្រើនទាំងនៅកម្ពុជា និងថៃ។ ហើយក៏សូមអរគុណដល់ ឯកឧត្តមនាយករដ្ឋមន្រ្តី ម៉ាឡេស៊ី អាន់វ៉ា អ៊ីប្រាហ៊ីម ដែលបានជួយរៀបចំទីកន្លែងកិច្ចប្រជុំ និងបង្កើតឱ្យមានកិច្ចព្រមព្រៀងបទឈប់បាញ់នេះ ដែលកិច្ចព្រមព្រៀងឈប់បាញ់ និងសន្តិភាពនេះ កំពុងទទួលបានលទ្ធផលល្អ និងប្រកបដោយប្រសិទ្ធភាព។
ខ្ញុំក៏សូមអរគុណចំពោះមិត្តចិនដែលបានចូលរួមជួយ និងសូមអរគុណបណ្តាប្រទេសជាមិត្តទាំងអស់ ដែលបានគាំទ្រនូវកិច្ចព្រមព្រៀងបទឈប់បាញ់ និងសូមអរគុណប្រជាជនកម្ពុជា និងប្រជាជនថៃ សូមអរគុណចំពោះកងទ័ពកម្ពុជា ព្រមទាំងកងទ័ពថៃ ដែលបានគាំទ្រដល់ដំណើរការសន្តិភាពមួយនេះ»៕
