Influencer ស្រីវ័យក្មេងដ៏ល្បីម្នាក់នៅតៃវ៉ាន់ ដែលផ្ទុះប្រជាប្រិយភាពជុំវិញការធ្វើវីដេអូ mukbang ញ៉ាំគ្រឿងសម្អាង បានទទួលមរណភាពហើយទាំងវ័យត្រឹម ២៤ ឆ្នាំ។ ដំណឹងមរណភាពភ្លាមៗរបស់អ្នកផលិតមាតិការូបនេះដែរ បានធ្វើឱ្យមហាជនតាមបណ្ដាញសង្គមជាច្រើនក្នុងប្រទេសចិន ដាក់ការសង្ស័យថានាងអាចនឹងបាត់បង់ជិវិតដោយសារតែការពុលគ្រឿងសម្អាងដែលនាងតែងតែយកមកញ៉ាំនោះ។
Guava Beauty ជាអ្នកផលិតមាតិកាវ័យ ២៤ ឆ្នាំម្នាក់ ដែលមានអ្នកតាមដានលើបណ្ដាញសង្គមប្រមានជាង ១២០០០ នាក់។ នាងទទួលបានភាពល្បីល្បាញដោយសារតែមុខមាត់ដ៏ស្រស់សោភារបស់នាង បូករួមជាមួយនឹងការផលិតមាតិកាប្លែកៗដូចជា «make-up mukbang» នេះជាដើម។
រាល់វីដេអូ «make-up mukbang» ដែលនាងធ្វើមានដូចជាការញ៉ាំផលិតផលសម្រស់មួយចំនួនដូចជា ក្រែមលាបមាត់ គូល័រផាត់ថ្ពាល់ ម៉ាស់បិទមុខ និង សំឡីជូតមុខជាដើម។ វីដេអូរបស់នាងបានទាក់ទាញអ្នកទស្សនាជាច្រើន ហើយខណៈមួយភាគធំបញ្ចេញប្រតិកម្មភ្ញាក់ផ្អើល មានមួយចំនួនទៀតបានបង្ហាញក្ដីបារម្ភចំពោះសុខភាពរបស់នាង ព្រោះពួកគេជឿថាផលិតផលទាំងនោះគឺមិនសុវត្ថិភាពក្នុងការយកមកញ៉ាំបែបនេះឡើយ។
យ៉ាងណាមិញ មកដល់ថ្ងៃទី ២៤ ខែឧសភា ឆ្នាំ ២០២៥ កន្លងទៅ ដំណឹងមរណភាពរបស់នាងក៏ត្រូវបានប្រកាសដោយក្រុមគ្រួសារ។ សារលិខិតប្រកាសនោះដែរបានរៀបរាប់ថា៖ «វាជារឿងដ៏សោកសៅបំផុតមួយដែលពួកយើងចង់ប្រាប់អ្នកទាំងអស់គ្នាថា ក្មេងស្រីដែលជាកំណប់ទ្រព្យនៃ beauty-product mukbangs, Guava Beauty បានទម្លាក់ជក់របស់នាង ហើយហោះហើរទៅចាប់ផ្ដើម channel ថ្មីនៅឋានសួគ៌ហើយនៅថ្ងៃទី ២៤ ខែឧសភា ឆ្នាំ ២០២៥។ អរគុណគ្រប់គ្នាដែលតែងតែចុច like, comment និង សើចសប្បាយជាមួយនាង។ នាងពិតជាពេញចិត្តវាណាស់…»។
សេចក្ដីប្រកាសដំណឹងមរណភាពភ្លាមៗរបស់អ្នកផលិតមាតិកាវ័យក្មេងរូបនេះដែរ បានធ្វើឱ្យមហាជនជាច្រើនផ្ទុះការវែកញែកដោយខ្លះសង្ស័យថានាងអាចស្លាប់ដោយសារការពុលរបស់ដែលនាងយកមកញ៉ាំ ខណៈមួយចំនួនទៀតគិតថានាងអាចស្លាប់ដោយសារគាំងបេះដូង៕
ប្រភព៖ SCMP
