មិនទាន់ធ្វើចិត្តបានទេ! ស្វាមី សាន់ឆាយ នៅយំរាល់ថ្ងៃ បាយក៏នឹកទឹកក៏មិនស្រេក ដល់ថ្នាក់ស្រកគីឡូស្រឺតៗ

គិតមកទល់ពេលនេះ តារាសម្ដែងស្រី Barbie Hsu បានលាចាកឆ្ងាយចោលក្រុមគ្រួសារ និង មហាជន បានជិត ១ ខែហើយ តែការបាត់វត្តមានរបស់តារាស្រីរូបនេះនៅតែធ្វើឱ្យស្វាមីរបស់នាង Koo Jun Yup (DJ Koo) សោកសៅធ្វើចិត្តមិនទាន់បានរហូតលែងបាយលែងទឹកទៀតផង។

ជាក់ស្ដែង កាលពីថ្ងៃទី ២៦ ខែកុម្ភៈ ឆ្នាំ ២០២៥ កន្លងទៅ ប្រភពជិតស្និទ្ធនឹងលោក Koo Jun Yup មួយបានប្រាប់សារព័ត៌មានតៃវ៉ាន់ Mirror Weekly ថា៖ «Koo Jun Yup នៅតែសោកសៅខូចចិត្តខ្លាំង ទឹកភ្នែកស្រក់រៀងរាល់ថ្ងៃ។ គាត់នៅមិនទាន់អាចធ្វើចិត្តបានឡើយដោយការបាត់បង់ប្រពន្ធភ្លាមៗបែបនេះ»។ ប្រភពដដែលបានបន្តទៀតថា៖ «ឱ្យតែពេលនិយាយដល់ Koo Jun Yup និង Barbie Hsu ពួកយើងទប់ទឹកភ្នែកមិនជាប់នោះឡើយ។ ភ្នែក Koo Jun Yup ហើមឡើងលឹបអស់ហើយព្រោះតែគាត់យំខ្លាំងពេក យំម្លឹងហើយគាត់នៅតែមិនអាចធ្វើចិត្តបាន គាត់លែងនឹកនាបាយទឹករហូតស្រកគីឡូខ្លាំងមែនទែន»។

ជាមួយគ្នានោះដែរ បើតាមសារព័ត៌មានតៃវ៉ាន់មួយទៀត ET Today បានទម្លាយឱ្យដឹងថា មិត្តភក្តិ និង អ្នកស្គាល់ Koo Jun Yup គឺមានការបារម្ភពីសុខភាពរបស់លោកជាខ្លាំង។ DJ Koo នៅមិនអាចរៀបចំរបស់របរដែលមានអនុស្សាវរីយ៍ជាមួយប្រពន្ធ ហើយនៅតែសោកសៅនឹកគិតដល់ប្រពន្ធគ្រប់ពេល។ បើទោះជាមិត្តភក្តិ និង ក្រុមគ្រួសារព្យាយាមលួងលោមលោកយ៉ាងណា ក៏ដូចហាក់មិនទទួលបានផលដែរ។ សារព័ត៌មាន ET Today បានបញ្ជាក់ដែរថា៖ «Goo Jun Yup ធ្លាប់ជាមនុស្សដែលមានចរិតរីករាយ និង វិជ្ជមាន តែក្រោយហេតុការណ៍តក់ស្លុតនេះបានធ្វើឱ្យលោកប៉ះពាល់អារម្មណ៍ខ្លាំងមែនទែន»។

គួរបញ្ជាក់ថា DJ Koo បានលុបចោលការងាររបស់លោកទាំងអស់ លោកលែងឃើញមុខក្នុងការសម្ដែងជា DJ លែងឃើញវត្តមានលើកញ្ចក់ទូរទស្សន៍ រួមទាំងរាល់កម្មវិធីទាំងអស់ ដោយលោកជ្រើសរើសផ្ដាច់ខ្លួនរស់នៅតែឯងក្នុងភាពសោកសៅ៕

ប្រភព៖ AllKpop