មហាជនអ្នកស្នេហាវិស័យហ្វេសិនថ្មីៗប្លែកៗផ្ទុះការចាប់អារម្មណ៍ទៀតហើយ ដោយម៉ាកដ៏ល្បី Balenciaga បានបញ្ចេញម៉ូដកាបូបប្លែកថ្មីជាកាបូបនីឡុងទក់ៗដូចថង់ប្លាស្ទិកគេយួរទិញអីវ៉ាន់តាមផ្សារ ដាក់លក់ក្នុងតម្លៃរហូតដល់ ៩៩៥ ដុល្លារ។
តាមការចេញផ្សាយរបស់ Trend Hunter កាបូបម៉ូដថ្មីនេះមានឈ្មោះថា Marché Packable Tote bag ជាកាបូបស្ថិតក្នុងខូឡិកសិន Fall/Winter 2025 ដែលធ្វើឡើងពីធាតុផ្សំមានគុណភាពខ្ពស់ដូចជានីឡុងប្រភេទប៉ូលីអាមីត និង dyneema ដែលជាប្រភេទសរសៃរឹងមាំខ្លាំងដូចដែកថែប។ កាបូបមានព្រីនម៉ាក Balenciaga នៅពីលើ អមដោយអាសយដ្ឋានហាងនៅប៉ារីសមួយចំនួន ច្នៃចេញបែបទក់ៗឱ្យមើលទៅដូចកាបូបចាស់ៗ និង អ្វីដែលពិសេសនោះកាបូបនេះអាចដាក់របស់បានដល់ទម្ងន់ ១០ គីឡូក្រាម។
គួរបញ្ជាក់ដែរថា កាបូប Marché Packable Tote bag នេះគឺបើកឱ្យមានការកម្មង់ទុកមុនហើយ និង ទទួលបានការដឹកជញ្ជូនដោយឥតគិតថ្លៃក្នុងខែតុលា ឆ្នាំ ២០២៥ ខាងមុខនេះ៕
