កាលពីថ្ងៃទី ២៨ ខែឧសភា ឆ្នាំ ២០២៥ កន្លងទៅ នៅប្រទេសស្វីសមានហេតុការណ៍បាក់រលំផ្ទាំងទឹកកដ៏ធំមួយពីលើកំពូលភ្នំ បង្កជាបំណាក់ដីល្បាប់លាយឡំនឹងទឹកកកហូរធ្លាក់យ៉ាងខ្លាំងក្លាចុះមកក្រោមគ្របកប់ពីលើភូមិមួយខាងក្រោមសឹងទាំងស្រុង តែជាសំណាងល្អក្នុងភូមិមិនមានមនុស្សដោយសារអាជ្ញាធរជម្លៀសចេញតាំងពីថ្ងៃទី ១៩ ខែឧសភា ឆ្នាំ ២០២៥ កន្លងទៅ ដោយសារតែបារម្ភហានិភ័យនៃការរអិលបាក់ដី និង ថ្មនេះ។
តាមរយៈវីដេអូដែលថតដោយដ្រូនរបស់ខាងទូរទស្សន៍ជាតិរបស់ស្វីស SRF បានបង្ហាញឱ្យឃើញស្ដែងៗគួរឱ្យខ្លាចបំផុតនៃទិដ្ឋភាពបំណាក់ដីភ្នំ ដែលហូរនាំថ្ម ដីល្បាប់យ៉ាងខ្លាំង និង រហ័សធ្លាក់មកសង្កត់កប់ភូមិ Blatten រាបដល់ដីសឹងទាំងស្រុង។
តាមការបញ្ជាក់ពីមន្ត្រីក្នុងសន្នីសីទកាសែតថ្មីមួយកាលពីថ្ងៃទី ២៨ ខែឧសភា ឆ្នាំ ២០២៥ បានឱ្យដឹងថា វាអាចទាមទារពេលវេលារហូតដល់រាប់ឆ្នាំដើម្បីស្ដារការខូចខាតឡើងវិញ ដោយបច្ចុប្បន្នពួកគេក៏កំពុងនៅបន្តពិនិត្យវាយតម្លៃមើលលើការខូចខាតដែលបានកើតឡើងនេះ៕
Photo: AP
