លោកនាយករដ្ឋមន្ត្រីប្រទេសនេប៉ាល់ KP Sharma Oli បានប្រកាសលាលែងពីតំណែងកាលពីថ្ងៃទី ០៩ ខែកញ្ញា ឆ្នាំ ២០២៥ កន្លងទៅ ក្រោយបាតុកម្មដ៏ខ្លាំងក្លាក្នុងប្រទេសបណ្ដាលឱ្យមានមនុស្សស្លាប់យ៉ាងហោចណាស់ ២២ នាក់ ខណៈរាប់រយនាក់ផ្សេងទៀតរងរបួស។
ការលាលែងពីតំណែងរបស់លោក Oli កើតមានឡើងស្រដៀងទៅនឹងចំណាត់ការបស់មន្ត្រីផ្សេងៗទៀតជុំវិញការឆ្លើយតបនឹងការធ្វើបាតុកម្មនេះ។ ជាក់ស្ដែង រដ្ឋមន្ត្រីក្រសួងមហាផ្ទៃ Ramesh Lekhak បានចុះចេញពីតំណែងកាលពីថ្ងៃទី ០៨ ខែកញ្ញា កន្លងទៅ និង មួយថ្ងៃក្រោយមក រដ្ឋមន្ត្រីក្រសួងកសិកម្ម ធារាសាស្ត្រ និង សុខាភិបាល ក៏បានសម្រេចលាឈប់ពីតំណែងដូចគ្នា។
ប៉ុន្មានម៉ោងក្រោយលោកនាយករដ្ឋមន្ត្រីប្រកាសលាចេញពីតំណែង កងទ័ពប្រទេសនេប៉ាល់បានអំពាវនាវឱ្យមានកដំណោះស្រាយដោយសន្តិវិធីតាមការសន្ទនាគ្នា ខណៈជម្រុញឱ្យពលរដ្ឋទាំងអស់រក្សាការអត់ធ្មត់ដើម្បីបញ្ចៀសកុំឱ្យមានការបាត់បង់ជីវិតមនុស្ស និង ទ្រព្យសម្បត្តិបន្ថែមទៀត ក្នុងស្ថានភាពដ៏អាក្រក់នេះ។
គួរឱ្យដឹងថា សកម្មភាពបាតុកម្មដោយហិង្សាក្នុងពេលថ្មីៗនេះដែរ គឺធ្វើឡើងដោយក្រុមយុវវ័យ Gen Z (អាយុចន្លោះ ១៣-២៨ ឆ្នាំ) ដែលនេះចាត់ទុកជាសកម្មភាពវឹកវរចលាចលដ៏អាក្រក់បំផុតមិនធ្លាប់មាននៅប្រទេសនេប៉ាល់ក្នុងពេលច្រើនទសវត្សរ៍មកនេះ។ ក្រុមបាតុករបានធ្វើបាតុកម្មពេញដងផ្លូវ បើទោះជាមានការដាក់បម្រាមគោចរ ឬ ក្រោយរដ្ឋាភិបាលលុបចោលការហាមប្រាមប្រព័ន្ធបណ្ដាញសង្គមក៏ដោយ។
បាតុកម្មនេះដែរ ចាប់ផ្ដើមកើតមានឡើងនៅពេលរដ្ឋាភិបាលប្រទេសនេប៉ាល់បានបិទបណ្ដាញសង្គមចំនួន ២៦ ក្នុងប្រទេស ដោយក្នុងនោះរួមមានបណ្ដាញសង្គមហ្វេសប៊ុក និង TikTok ផងដែរ តែយ៉ាងណាមិញ ក៏មានការលើកឡើងថាការធ្វើបាតុកម្មពេញប្រទេសនេះគឺមិនមែនត្រឹមតែប្រតិកម្មប្រឆាំងលើការបិទបណ្ដាញសង្គមនោះទេ ប៉ុន្តែក៏ជាការឆ្លុះបង្ហាញពីការខកចិត្តចំពោះបញ្ហាសេដ្ឋកិច្ចដ៏ខ្សោយក្នុងប្រទេសផងដែរ។ ជាក់ស្ដែង បើតាមទិន្នន័យពីធនាគារពិភពលោក អត្រាអ្នកអត់មានការងារធ្វើសម្រាប់ជនជាតិនេប៉ាល់អាយុចន្លោះ ១៥ ទៅ ២៤ ឆ្នាំ គឺហក់ឡើងដល់ ២០.៨% ក្នុងឆ្នាំ ២០២៤៕
Photo: AP, AFP
