ម្ដាយអតីតតារាស្រី Kim Sae Ron កំពុងត្រៀមខ្លួនធ្វើការចេញមុខបដិសេធគោលជំហររបស់ទីភ្នាក់ងារ Gold Medalist ដោយផ្ទាល់ ខណៈខាងក្រុមគ្រួសាររបស់នាងមានការខឹងសម្បាយ៉ាងខ្លាំងដោយឃើញសេចក្ដីថ្លែងការណ៍របស់ភ្នាក់ងារខាងលើសរសេរបំភ្លៃការពិត។
នៅថ្ងៃទី ១៤ ខែមីនា ឆ្នាំ ២០២៥ នេះ បានការទម្លាយថាម្ដាយរបស់ Kim Sae Ron កត់សម្គាល់ជាបុគ្គល A កំពុងតែរៀបចំការបកស្រាយបដិសេធប្រឆាំងនឹងសេចក្ដីថ្លែងការណ៍របស់ទីភ្នាក់ងារ Kim Soo Hyun។ លោកស្រី A បច្ចុប្បន្នកំពុងតែជួបបញ្ហាលំបាកក្នុងការរស់នៅជីវិតប្រចាំថ្ងៃដោយសារតែអាការខ្វិនលើផ្ទៃមុខដែលបណ្ដាលពីបញ្ហាស្ត្រេសក្រោយការស្លាប់របស់កូនស្រី។ ជាមួយគ្នានេះដែរ បុគ្គល B ដែលជាអ្នកមើលថែ Kim Sae Ron តាំងពីនាងកើតមក ត្រូវបានបង្ហាញខ្លួនផ្ដល់បទសម្ភាសជំនួសលោកស្រី A ជុំវិញបញ្ហាដែលបានកើតឡើងចំពោះកូនស្រី។
បុគ្គល B ក៏ត្រូវជាម្ដាយមីងដែលផ្ដល់បទសម្ភាសឱ្យ channel youtube «Garosero» ថ្មីៗនេះផងដែរ។ ចំពោះបងប្អូនជីដូនមួយដែល Kim Sae Ron ឆាតជាមួយពាក់ព័ន្ធនឹងលិខិតបកស្រាយរបស់នាងក្នុងខែមីនា ឆ្នាំ ២០២៤ កន្លងទៅនោះ ក៏ត្រូវជាកូនស្រីរបស់បុគ្គល B ដូចគ្នា។ ក្រុមគ្រួសាររបស់ Kim Sae Ron និង គ្រួសាររបស់បុគ្គល B គឺជិតស្និទ្ធគ្នាជាង ២០ ឆ្នាំហើយទើប Kim Sae Ron ហៅនាងថា «មីង»។
ក្នុងសេចក្ដីថ្លែងការណ៍ដែលខាងភ្នាក់ងារ Gold Medalist ចេញប្រកាសនៅថ្ងៃនេះ ពួកគេបានទម្លាយថាព័ត៌មានដែលបង្ហាញលើ channel «Garosero» គឺជាការអះអាងមិនត្រឹមត្រូវ ហើយអត្តសញ្ញាណបុគ្គលដែលមកធ្វើកិច្ចសម្ភាសនោះក៏មិនទាន់បញ្ជាក់ច្បាស់នោះដែរ។ ឆ្លើយតបនឹងការលើកឡើងនេះ ខាងក្រុមគ្រួសារ Kim Sae Ron បានបញ្ជាក់ថា Gold Medalist គឺតាមពិតបានស្គាល់បុគ្គល B ហើយបុគ្គល B នោះទៀតសោតក៏បានទៅទទួល Kim Sae Ron ដោយផ្ទាល់ពេលមាន schedule ពាក់ព័ន្ធនឹង Gold Medalist និង ថែមទាំងបានជួបជាមួយពួកគេដោយផ្ទាល់ពីមុនទៀតផង។
ម្ដាយ Kim Sae Ron បានចេញមកនិយាយបកស្រាយក្ដៅៗទាំងដែលគាត់កំពុងមានបញ្ហាសុខភាពបែបនេះ ក៏ព្រោះតែគាត់ជឿជាក់ថា Gold Medalist បានបកស្រាយបំភ្លៃការពិតច្រើន៕
ប្រភព៖ Koreaboo
