តារារ៉េបស្រីម្នាក់នៅរុស្ស៊ី ត្រូវប្រទះឃើញស្ល-ា./ប់ក្នុងអាងត្រាំទឹកក្ដៅ ក្នុងសភាពមុខរលួ./យមើលលែងយល់ នៅបន្ទប់អាផាតមិនផ្ទាល់ខ្លួន

តារារ៉េប និង ជាតារា TikTok ស្រីវ័យ ៣២ ឆ្នាំម្នាក់នៅរុស្ស៊ី ឈ្មោះ Victoria Lerman ត្រូវបានប្រទះឃើញស្លាប់ក្នុងបន្ទប់ទឹកនាអាផាតមិនរបស់ខ្លួននៅក្រុង Achinsk តំបន់ Kransnoyarsk Krai។ តាមការធ្វើកោសល្យវិច័យបានបង្ហាញឱ្យឃើញថា តារារ៉េបស្រីរូបនេះរងការរលាកធ្ងន់ធ្ងរពាសពេញរាងកាយ ឯមុខរលាករហូតរលួយមើលលែងយល់។ តាមការបញ្ជាក់ពីខាងអាជ្ញាធរ សាកសពរបស់នាង Victoria ត្រូវបានសង្សារនាងប្រទះឃើញត្រឹមប៉ុន្មានម៉ោងក្រោយនាងប្រាប់លោកថានាងចូលទៅងូតទឹក។

ការស៊ើបអង្កេតបឋមបានសន្មតថា នាង Victoria ស្លាប់ដោយសារការរលាកទឹកក្ដៅដែលនាងបើកត្រាំខ្លួនក្ដៅលើសកម្រិតពេក។ ពេលដែលនាងចូលងូតហើយទឹកក្ដៅពេក ធ្វើឱ្យនាងមានប្រតិកម្មក្នុងខ្លួនរហូតដល់សន្លប់រាប់ម៉ោងទាំងដែលទឹកក្ដៅហូរស្រោចមកលើផ្ទៃមុខរបស់នាង។

ការរងទឹកក្ដៅហូរកាត់មុខរាប់ម៉ោងបានធ្វើឱ្យមុខរបស់ Victoria រលាករលួយមើលលែងយល់ ហើយទម្រាំសង្សារនាងចូលមកឃើញ ទាក់ទងទៅខាងសង្គ្រោះបន្ទាន់ឱ្យជួយគឺវាយឺតពេលបាត់ទៅហើយ។

យ៉ាងណាមិញ ករណីស្លាប់របស់តារារ៉េបស្រីរូបនេះ ខាងក្រុមគ្រួសារ និង មិត្តភក្តិរបស់នាងមិនជឿលើការលើកឡើងរបស់សង្សារនាងឡើយ ដោយពួកគេសង្ស័យថានេះជាទង្វើរបស់បុរសជាសង្សារនោះសម្លាប់នាង។

ខាងប៉ូលិសក៏កំពុងដាក់ការស៊ើបអង្កេត តែការស្រាវជ្រាវដំបូងប៉ូលិសរកឃើញសារធាតុញៀនមួយចំនួនក្នុងអាផាតមិនជនរងគ្រោះ។ អាជ្ញាធរដាក់ការសង្ស័យថា គូស្នេហ៍ពួកគេបានប្រើប្រាស់ថ្នាំញៀនអំឡុងពេលហេតុការណ៍ខាងលើកើតឡើងនោះ។ យ៉ាងណាមិញ ការស៊ើបអង្កេតរកមូលហេតុពិតប្រាកដនៅបន្តធ្វើឡើងនៅឡើយ៕

ប្រភព៖ Kenh14