កាលពីថ្ងៃទី ១៦ ខែកញ្ញា ឆ្នាំ ២០២៥ កន្លងទៅ សារព័ត៌មាននៅអាមេរិកបានចេញផ្សាយដំណឹងដ៏សោកសៅមួយ ដោយតារាសម្ដែង Robert Redford បានទទួលមរណភាពក្នុងវ័យ ៨៩ ឆ្នាំ នៅក្នុងផ្ទះរបស់លោកនារដ្ឋ Utah សហរដ្ឋអាមេរិក។
ដំណឹងដ៏ក្រៀមក្រំនេះត្រូវបានប្រកាសដោយអ្នកតំណាងរបស់លោកទៅកាន់ភ្នាក់ងារសារព័ត៌មានថា៖ «Robert Redford បានចាយដង្ហើមចុងក្រោយរបស់លោកកាលពីថ្ងៃទី ១៦ ខែកញ្ញា ក្នុងគេហដ្ឋានរបស់លោកនៅតំបន់ភ្នំនារដ្ឋ Utah ដែលជាទីកន្លែងដែលលោកស្រឡាញ់ ពោរពេញដោយមនុស្សជាទីស្រឡាញ់នៅជុំវិញខ្លួន។ លោកនឹងនៅតែដក់ជាប់ក្នុងចិត្តយើងគ្រប់គ្នាជានិច្ច។ ក្រុមគ្រួសាររបស់លោកស្នើសុំភាពជាឯកជនក្នុងពេលវេលាដ៏លំបាកនេះ»។ ដំណឹងមរណភាពរបស់តារាសម្ដែងម្នាក់ប្រចាំរឿងរបស់ MCU រូបនេះ បានធ្វើឱ្យមហាជនជាច្រើនគ្រប់ទិសទីបង្ហាញការសោកស្ដាយជាខ្លាំង។
Robert Redford បានកើតក្នុងឆ្នាំ ១៩៣៦ ដោយឈ្មោះពេញរបស់លោកគឺ Charles Robert Redford។ កាលពីក្មេង លោកត្រូវបានគេបណ្ដេញចេញពីសាលា University of Colorado និង ក្រោយមកក៏ចាប់រៀនជំនាញសម្ដែងនៅ American Academy of Dramatic Arts (AADA)។ លោកបានចូលរួមសម្ដែងលើឆាក ហើយក៏បន្តប្រឡូកចូលសម្ដែងតាមទូរទស្សន៍ និង ភាពយន្ត រហូតមានអ្នកស្គាល់នៅដើមឆ្នាំ ១៩៩០។ លោក Robert Redford បានចូលរួមសម្ដែងក្នុងភាពយន្តល្បីៗជាច្រើន ហើយក៏បានសម្ដែងរួមគ្នានឹងតារាស្រីៗស្រស់ស្អាតជាច្រើនដែរដូចជា Jane Fonda, Barbra Streisand, Faye Dunaway, Meryl Streep និង Michelle Pfeiffer ជាដើម។
មកដល់ឆ្នាំ ១៩៨០ លោកក៏បានក្លាយជាអ្នកដឹកនាំរឿង និង ឈ្នះពានរង្វាន់ Oscars ចំនួន ៤ លើខ្សែភាពយន្ត Ordinary People។ ក្រោយមក លោកក៏បានធ្វើការជាតារាសម្ដែងផង និង ជាអ្នកដឹកនាំរឿងផង ដោយទទួលបានជោគជ័យខ្លាំងលើអាជីពនេះ។ ក្នុងដំណើរជីវិតការងាររបស់លោក Robert Redford បានឈ្នះពានរង្វាន់ធំៗជាច្រើនទៀតរួមមាន ពានរង្វាន់កិត្តិយសរបស់ Oscar ក្នុងឆ្នាំ ២០០២ ពាន Golden Lion នៅ Venice Film Festival ក្នុងឆ្នាំ ២០១៧ ពានរង្វាន់កិត្តិយស Cesar ក្នុងឆ្នាំ ២០១៩ ពាន French Legion of Honor ក្នុងឆ្នាំ ២០១០ និង មេដាយ US Presidential Medal of Freedom ផ្ដល់ដោយអតីតប្រធានាធិបតីអាមេរិក Barack Obama ក្នុងឆ្នាំ ២០១៦។
បន្ថែមពីនេះ លោក Robert Redford ក៏ផ្ទុះប្រជាប្រិយភាពមានយុវវ័យសម័យថ្មីបានស្គាល់លោកច្រើនផងដែរក្នុងនាមជាតួអង្គ Alexander Pierce ជាលេខានៃក្រុមប្រឹក្សាសន្តិសុខពិភពលោក និង ជាមេក្រុមបង្កប់ខ្លួននៃ HYDRA ប្រចាំរឿងរបស់ MCU។ វត្តមានសម្ដែងរបស់លោកមានក្នុងរឿងចំនួន ២ របស់ MCU រួមមានរឿង «Captain America: The Winter Soldier (2014)» និង រឿង «Avengers: Endgame (2019)»៕
