តារាសម្ដែងប្រុសហុងកុង Gabriel Harrison ថ្មីៗនេះ បានធ្វើឱ្យអ្នកគាំទ្ររបស់លោកជាច្រើនមានការព្រួយបារម្ភខ្លាំង ក្រោយរូបលោកបានចេញមកទម្លាយថា ភរិយារបស់លោក Effie Mok កើតមានជំងឺក្រិនថ្លើម និង កំពុងត្រូវការការវះកាត់ជាបន្ទាន់។
ជាក់ស្ដែង កាលពីថ្ងៃទី ០៨ ខែវិច្ឆិកា ឆ្នាំ ២០២៥ កន្លងទៅ តារាសម្ដែងប្រុសវ័យ ៥២ ឆ្នាំរូបនេះ បានប្រើប្រាស់បណ្ដាញសង្គម Instagram ដើម្បីរៃអង្គាសថវិកា ព្រោះតែលោកត្រូវការថវិកាបន្ទាន់ចំនួន ១.៥ លានដុល្លារហុងកុង (ប្រមាណ ១៩២ ៩៨៩ ដុល្លារអាមេរិក) ដើម្បីជួយសង្គ្រោះជីវិតប្រពន្ធដែលត្រូវវះកាត់ប្ដូរថ្លើមជាបន្ទាន់។
តាមរយៈការឡាយទាំងទឹកភ្នែក តារាប្រុស Harrison បានទម្លាយថា បច្ចុប្បន្នលោកទទួលបានការជួយពីមិត្តភក្តិបានប្រាក់ចំនួន ៧០ ម៉ឺនដុល្លារហុងកុងហើយ ប៉ុន្តែចំនួននេះគឺនៅមិនទាន់គ្រប់ថ្លៃព្យាបាលប្រពន្ធឡើយ។ លោកបន្ថែមទៀតថា ប្រពន្ធលោកកំពុងស្ថិតក្នុងស្ថានភាពធ្ងន់ធ្ងរ ដោយគ្រូពេទ្យព្រមានថា ប៉ុន្មានថ្ងៃទៀតតម្រូវឱ្យវះកាត់ប្ដូរថ្លើមជាចាំបាច់។
គួរឱ្យដឹងថា ភរិយារបស់តារាប្រុស Gabriel Harrison បានសម្រាកព្យាបាលនៅមន្ទីរពេទ្យ Queen Mary Hospital រយៈពេល ២០ ថ្ងៃមកហើយ ប៉ុន្តែនៅតែមិនទាន់មានឈ្មោះក្នុងបញ្ជីរង់ចាំវះកាត់ផ្លាស់ប្ដូរថ្លើមឡើយ ទើបក្រោយមក លោកបានផ្លាស់ប្រពន្ធទៅមន្ទីរពេទ្យ Zhongshan នៅ Guangzhou ដើម្បីព្យាបាលបន្តវិញ។
ថ្លែងទាំងទឹកភ្នែកសស្រាក់ Harrison បាននិយាយថា៖ «ខ្ញុំសង្ឃឹមថាគ្រប់គ្នាអាចជួយខ្ញុំតាមលទ្ធភាព។ ខ្ញុំអរគុណខ្លាំងមែនទែន។ អរគុណសម្រាប់ការជួយពីគ្រប់គ្នា»។ គួររំឭកថា តារាសម្ដែងប្រុស Gabriel Harrison និង ភរិយាជា makeup artist ឈ្មោះ Effie Mok បានជួបគ្នាដំបូងអំឡុងពេលធ្វើការជាមួយគ្នានៅប៉េកាំង ក្នុងឆ្នាំ ២០១២ ក្រោយមកពួកគេក៏បានរៀបការជាមួយគ្នានៅក្នុងឆ្នាំ ២០១៧៕
