ថ្មីៗនេះ សារព័ត៌មានជាច្រើននៅសហរដ្ឋអាមេរិកបានចេញផ្សាយករណីដ៏រន្ធត់មួយដោយលោកស្រី Robin Kaye ដែលជា music director ប្រចាំកម្មវិធីដ៏ល្បី «American Idol» និង ស្វាមីរបស់លោកស្រី Thomas Deluca ត្រូវបានខ្មាន់កាំភ្លើងបាញ់ស្លាប់ក្នុងផ្ទះរបស់ពួកគេនាតំបន់ Encino នៅក្រុង Los Angeles។
តាមការបញ្ជាក់របស់ប៉ូលិសបានឱ្យដឹងថា សាកសពជនរងគ្រោះទាំងពីរនាក់ត្រូវបានប្រទះឃើញកាលពីរសៀលថ្ងៃទី ១៤ ខែកក្កដា ឆ្នាំ ២០២៥ (ពេលវេលាក្នុងតំបន់) ក្រោយក្រុមគ្រួសារ និង មិត្តភក្តិមិនអាចទាក់ទងពួកគេបានរយៈពេល ៤ ថ្ងៃ។ សពរបស់លោកស្រី Kaye ត្រូវបានប្រទះឃើញនៅចង្ក្រានបាយ ខណៈសពរបស់លោក Deluca ត្រូវបានរកឃើញនៅក្នុងបន្ទប់ទឹក។
ផ្អែកតាមការស៊ើបអង្កេតបឋម ប៉ូលិសបានរកឃើញជនសង្ស័យម្នាក់ឈ្មោះ Raymond Boodarian អាយុ ២២ ឆ្នាំ បានលួចចូលផ្ទះជនរងគ្រោះកាលពីថ្ងៃទី ១០ ខែកក្កដា ឆ្នាំ ២០២៥ កន្លងទៅ។ រូបគេបានពួន និង រង់ចាំក្នុងផ្ទះនោះ ហើយពេលលោកស្រី Kaye និង ស្វាមីត្រឡប់មកផ្ទះវិញ រូបគេក៏បានទាញកាំភ្លើងបាញ់ប្រហារលើជនរងគ្រោះតែម្ដង។
ជនសង្ស័យត្រូវបានប៉ូលិសក្រុង Los Angeles និង ក្រុម FBI ចាប់ខ្លួនកាលពីថ្ងៃទី ១៥ ខែកក្កដា ឆ្នាំ ២០២៥ ហើយចំពោះគោលបំណងនៃការសម្លាប់ជនរងគ្រោះគឺនៅមិនទាន់ដឹងច្បាស់នៅឡើយទេ គ្រាន់តែតាមការស៊ើបបឋម ប៉ូលិសសង្ស័យថាជាករណីប្លន់ហើយសម្លាប់៕
