ថ្មីៗនេះ មានរឿងរ៉ាវដ៏ហួសចិត្ត និង អស់សំណើចមួយបានកើតមានឡើងលើក្រុមគ្រួសារជនជាតិម៉ាឡេស៊ីដែលកើតការខ្លាចភ័យស្លន់មួយគ្រួសារ ដោយសារតែពួកគេបានប្រទះឃើញសត្វកញ្ចាញ់ចេកតូចមួយលោតចូលក្នុងផ្ទះ។
តាមសម្ដីសមាជិកម្នាក់ថ្លែងប្រាប់សារព័ត៌មាន WeirdKaya បានរៀបរាប់ថា៖ «ក្នុងផ្ទះយើងមានសមាជិកទាំងអស់ ៥ នាក់ តែម្នាក់ៗសុទ្ធតែខ្លាចពពួកកង្កែប កញ្ចាញ់ចេកទាំងអស់»។ គួរឱ្យដឹងថា ករណីមួយនេះមិនមាននរណាម្នាក់ក្នុងផ្ទះហ៊ានចេញមុខចាប់កញ្ចាញ់ចេកចេញឡើយ ហើយដោយអស់ជម្រើសពួកគេក៏សម្រេចចិត្តទាក់ទងទៅខាងក្រុមពន្លត់អគ្គិភ័យឱ្យចុះមកអន្តរាគមន៍ជួយ។
ក្រុមពន្លត់អគ្គិភ័យក៏បានទៅដល់ ហើយក៏បានធ្វើសកម្មភាពចាប់កញ្ចាញ់ចេកមួយក្បាលនោះចេញបានដោយជោគជ័យ។ រឿងរ៉ាវមួយនេះដែរបានធ្វើឱ្យមហាជនក្នុងប្រទេសម៉ាឡេស៊ីជាច្រើននាំគ្នាចែកចាយបន្តនិយាយបែបលេងសើចព្រោងព្រាតដោយខ្លះនិយាយថា ៖ «កញ្ចាញ់ចេកនោះឥលូវនេះកំពុងជាប់ឃុំរង់ចាំការសួរចម្លើយ»៕
