រដ្ឋាភិបាលយោធាមីយ៉ាន់ម៉ា បានប្រកាសកាលពីថ្ងៃទី ៣១ ខែមីនា ឆ្នាំ ២០២៥ កន្លងទៅថា ប្រទេសមីយ៉ាន់ម៉ានឹងធ្វើពិធីកាន់ទុក្ខទូទាំងប្រទេសដោយបង្ហូតទង់ជាតិត្រឹមពាក់កណ្ដាលចាប់ពីថ្ងៃទី ៣១ ខែមីនា រហូតដល់ថ្ងៃទី ០៦ ខែមេសា ឆ្នាំ ២០២៥ ខាងមុខ ដើម្បីសម្ដែងការរំលែកទុក្ខចំពោះការបាត់បង់អាយុជីវិតប្រជាពលរដ្ឋជាង ២ ពាន់នាក់ និង ការខូចខាតផ្ទះសម្បែងទ្រព្យសម្បត្តិដែលបង្កដោយគ្រោះរញ្ជួយដីកម្រិត ៧.៧ រ៉ិចទ័រ កាលពីថ្ងៃទី ២៨ ខែមីនា ឆ្នាំ ២០២៥ កន្លងទៅនោះ។
មកទល់ពេលនេះ ក្រុមសង្គ្រោះនៅតែបន្តស្វះស្វែងទាំងយប់ថ្ងៃដើម្បីរុករកជនរងគ្រោះដែលនៅសេសសល់ បើទោះជាក្ដីសង្ឃឹមរកអ្នកនៅមានជីវិតមានតិចតួចក៏ដោយ។ ជាមួយគ្នានេះដែរ កត្តាមួយចំនួនដូចជាកត្តាអាកាសធាតុជាដើម បានធ្វើឱ្យការរុករកជនរងគ្រោះកប់ក្រោមគំនរអគារមានការលំបាកខ្លាំងផងដែរ។
ជាក់ស្ដែង បើតាមការចេញផ្សាយដោយសារព័ត៌មាន CNA កាលពីព្រឹកថ្ងៃទី ៣១ ខែមីនា ឆ្នាំ ២០២៥ កន្លងទៅ ក្រុមសង្គ្រោះនៅក្រុង Mandalay គឺជួបប្រទះការលំបាកខ្លាំងដោយសារតែអាកាសធាតុក្ដៅខ្លាំងពេក។ តាមការព្យាករណ៍អាកាសធាតុនៅក្រៅគឺឡើងដល់ ៤០ អង្សាសេ ធ្វើឱ្យក្រុមសង្គ្រោះឆាប់ហត់នឿយ បូករួមជាមួយក្លិនអសោចពីសាកសព កាន់តែធ្វើឱ្យបេសកកម្មរុករកកាន់តែលំបាកថែមមួយកម្រិតទៀត។
គួរបញ្ជាក់ថា តាមការចេញផ្សាយដោយទូរទស្សន៍ជាតិមីយ៉ាន់ម៉ា MRTV បានឱ្យដឹងថា ចំនួនអ្នកស្លាប់ដោយគ្រោះរញ្ជួយដីបានកើនដល់ ២០៦៥ នាក់ អ្នករបួសមានជាង ៣៩០០ នាក់ និង ប្រមាណ ២៧០ នាក់កំពុងបាត់ខ្លួន៕
