ភ្នាក់ងារព្រៃឈើប្រចាំប្រទេសកូរ៉េបានឱ្យដឹងនៅថ្ងៃទី ២៦ ខែមីនា ឆ្នាំ ២០២៥ នេះថា ឧទ្ធម្ភាគចក្រមួយគ្រឿងបានធ្លាក់ខណៈកំពុងតែធ្វើប្រតិបត្តិការពន្លត់ភ្លើងឆេះព្រៃនៅតំបន់ Uiseong ខេត្ត North Gyeongsang ដោយពីឡុតត្រូវបានបាត់បង់ជីវិតនៅនឹងកន្លែង។
តាមការរៀបរាប់ពីភ្នាក់ងារខាងលើបាននិយាយថា៖ «ឧទ្ធម្ភាគចក្រពន្លត់ភ្លើងឆេះព្រៃបើកបរដោយពីឡុតម្នាក់បានធ្លាក់ ខណៈពេលកំពុងតែប្រតិបត្តិការប្រយុទ្ធជាមួយភ្លើងឆេះព្រៃដ៏ខ្លាំងក្លានៅតំបន់ភ្នំនៃតំបន់ Uiseong កាលពីវេលាម៉ោង ១២ និង ៥៤ នាទីថ្ងៃ (ពេលវេលាក្នុងតំបន់)។ ពួកយើងត្រូវបានគេរាយការណ៍ប្រាប់មកថា ពីឡុតលើឧទ្ធម្ភាគចក្រនោះបានស្លាប់នៅនឹងកន្លែង»។ បច្ចុប្បន្ន ការចុះប្រតិបត្តិពន្លត់ភ្លើងឆេះព្រៃដោយប្រើប្រាស់ឧទ្ធម្ភាគចក្រត្រូវបានផ្អាកជាបណ្ដោះអាសន្ន ដោយខាងអាជ្ញាធរកំពុងស៊ើបអង្កេតរកមូលហេតុបណ្ដាលឱ្យមានគ្រោះថ្នាក់នេះ។
គួររំឭកថា ភ្លើងឆេះព្រៃដ៏អាក្រក់ដែលបានឆាបឆេះឡើងដំបូងកាលពីថ្ងៃទី ២១ ខែមីនា ឆ្នាំ ២០២៥ កន្លងទៅនៅតំបន់ Sancheong ខេត្ត North Gyeongsang ភាគអាគ្នេយ៍ប្រទេសកូរ៉េខាងត្បូង ដោយបន្តរាលដាលឆេះទៅកាន់តំបន់ Uiseong និង តំបន់ក្បែរខាងនោះរួមមាន Andong, Cheongsong, Yeongyang និង Yeongdeok។
ក្រុមពន្លត់អគ្គិភ័យរាប់ពាន់នាក់ ឧទ្ធម្ភាគចក្ររាប់រយគ្រឿងដោយរួមមានទាំងកងកម្លាំងអាមេរិក-កូរ៉េ និង យានជាច្រើនត្រូវបានបញ្ជូនទៅធ្វើការពន្លត់អគ្គិភ័យដ៏ខ្លាំងក្លានោះ។ ចាប់តាំងពីភ្លើងចាប់ផ្ដើមឆេះមក ទាហានកូរ៉េខាងត្បូងប្រមាណ ៥ ពាន់នាក់ និង ឧទ្ធម្ភាគចក្រ ១៤៦ គ្រឿងត្រូវបានបញ្ជូនទៅជួយគ្រប់គ្រងអគ្គិភ័យនេះ។ តាមរបាយការណ៍បានពីអាជ្ញាធរបានឱ្យដឹងថា មនុស្សយ៉ាងហោចណាស់ ១៨ នាក់បានស្លាប់ និង ២០ នាក់ផ្សេងទៀតបានរងរបួសដោយក្នុងនោះ ៦ នាក់រងរបួសធ្ងន់ដោយសារភ្លើងឆេះព្រៃ៕
