រឿងរ៉ាវរវាងនាង Rachel Gupta ជាមួយនឹងស្ថាប័ន MGI នៅតែជាប្រធានបទដ៏ក្ដៅគគុកនៅឡើយសម្រាប់អ្នកស្នេហាវិស័យបវរកញ្ញា។ ជាក់ស្ដែង នាង Rachel Gupta បានចេញមកធ្វើការបង្ហោះជាផ្លូវការលើបណ្ដាញសង្គម IG របស់ខ្លួនជុំវិញការសម្រេចចិត្តលាលែងពីតំណែង MGI 2024 ខណៈមួយសន្ទុះក្រោយមក ខាងស្ថាប័ន MGI ក៏បានចេញលិខិតប្រកាសដកតំណែងរបស់នាង Rachel Gupta ដូចគ្នា។
ទាំងសងខាងសុទ្ធតែចេញមកប្រកាសដោយលើកហេតុផលរៀងៗខ្លួន តែយ៉ាងណាមិញថ្មីៗនេះទៀតសោត នាង Rachel Gupta ក៏បានចេញធ្វើវីដេអូបកស្រាយលម្អិតបន្ថែមជុំវិញបញ្ហាដែលនាងបានជួបប្រទះអំឡុងពេលកាន់តំណែង MGI 2024 រហូតដល់ពេលដែលនាងសម្រេចចិត្តលាលែងចោលតំណែងមួយនេះ។
តាមរយៈវីដេអូ នាង Rachel និយាយរៀបរាប់ទាំងទឹកភ្នែកថាខាងស្ថាប័ន MGI មិនមានការគោរពដល់នាងក្នុងនាមជាម្ចាស់មកុដនោះឡើយ។ នាងបានរៀបរាប់ថា ៖ «អ្នកទាំងអស់គ្នាដឹងទេ ពួកគេឱ្យយើងមកលក់ផលិតផលថោកៗតាម TikTok ប្រៀបដូចយើងជាអ្នកលក់ផលិតផល។ យើងជាម្ចាស់មកុដ យើងមានការងារនៅប្រទេសរបស់យើង យើងធ្វើអ្វីដែលតែងទទួលបានការគោរព តែពួកគេមកឱ្យយើងលក់ផលិតផលថោកៗតាម TikTok ព្រោះតែវារកលុយឱ្យពួកគេបាន។ ហើយយើងមិនអាចបដិសេធបានឡើយ ព្រោះតែមេយើងជាអ្នកឱ្យយើងធ្វើ»។
នាងបានរៀបរាប់ទៀតថា ៖ «អ្នកមានមនុស្សស្រី ដូចខ្ញុំជាឧទាហរណ៍ ជាវាគ្មិន ជាអ្នកដែលចង់និយាយពីបញ្ហា ជាអ្នកចង់បង្កើតការផ្លាស់ប្ដូរឱ្យពិភពលោកនេះ ជាអ្នកមានមតិគំនិតចង់ចែករំលែកច្រើនមិនមែនមកសម្រាប់តែមុខជំនួញ តែមកដើម្បីការងារសប្បុរសធម៌។ តែអ្នកឯងចង់ឱ្យនាងមកលក់គ្រឿងទេស ទឹកម្ទេស និង ផលិតផលចម្រុះផ្សេងទៀតតាម TikTok តើសមទេ?»៕
ប្រភព៖ Missosology
