មន្ទីរពេទ្យមួយកន្លែងក្នុងប្រទេសអូស្ត្រាលី ត្រូវបានស្គាល់ថាជាមន្ទីរពេទ្យសម្រាប់ជួសជុលកូនតុក្កតាដែលមានការបែកបាក់ ឬខូចត្រង់ផ្នែកណាមួយនៃរាងកាយ។ ចំពោះការជួសជុលលើតុក្កតាទាំងឡាយគឺធ្វើឡើងដោយលោក Geoff Chapman ដែលជាម្ចាស់ស្នងដំណែងទី ៣ លើមន្ទីរពេទ្យនេះ ។
ចាប់តាំងពីបើកដំណើរការក្នុងឆ្នាំ ១៩១៣ លោក Geoff និងក្រុមការងាររបស់លោក បានធ្វើការជួសជុលតុក្កតាប្រមាណជាង ៣ លានឯណោះ ។ លោកបាននិយាយថា «ពួកយើងគឺស្ថិតក្នុងចំណោមមនុស្សតិចតួចដែលអាចធ្វើការងារនេះ ។ ការជួសជុលតុក្កតាខូចៗចាស់ៗ គឺមិនមែនមនុស្សគ្រប់គ្នាសុទ្ធតែអាចធ្វើបាននោះទេ » ។
ក្នុងឆ្នាំ ២០១៤ មន្ទីរពេទ្យមួយនេះមានទីតាំងនៅភាគខាងត្បូងក្រុងស៊ីដនី ដែលមានចំនួនគ្រូពេទ្យសរុបទាំងអស់ ១២ នាក់ ។ ដូចជាក្រុមគ្រូពេទ្យព្យាបាលមនុស្ស បុគ្គលិកនៅទីនោះ មានជំនាញរៀងៗខ្លួនរាប់គិតពីផ្នែកភ្នែក តួខ្លួន និងសក់ ។ តាមស្ដាប់មើលទៅ កន្លែងនេះដូចជាគួរឲ្យស្រស់ស្អាត និងរីករាយណាស់ ដោយតែងតែជួយជួសជុលតុក្កតាចាស់ៗ ប៉ុន្តែធាតុពិត ទិដ្ឋភាពនៅខាងក្នុងនោះ គឺគួរឲ្យខ្លាចបំផុត ។
បើតាមសារព័ត៌មានបានឲ្យដឹងថា មន្ទីរពេទ្យតុក្កតាមួយនេះ គឺទទួលបានភាពជោគជ័យខ្លាំងនៅអំឡុងសង្គ្រាមលោកលើកទី ២ ដោយសារតែនៅពេលនោះ ច្បាប់នាំទំនិញចូលគឺមានការរឹតត្បិត ដូចនេះការចំណាយចង់ទិញតុក្កតាថ្មីគឺមានការពិបាកខ្លាំងបំផុត ។ ហេតុនេះហើយ ដោយគ្មានជម្រើស មនុស្សជំនាន់នោះមានតែយកតុក្កតាចាស់ៗដែលខូចយកទៅជួសជុល ដើម្បីបំពេញតម្រូវការកូនៗរបស់ខ្លួន ។
ម្ចាស់មន្ទីរពេទ្យតុក្កតាលោក Geoff បាននិយាយថា «ឪពុករបស់ខ្ញុំរស់នៅឆ្លងកាត់សម័យកាលសង្គ្រាមនោះ ហើយពេលនោះគឺជាពេលដែលមន្ទីរពេទ្យមានការមមាញឹកខ្លាំងបំផុត ។ នៅពេលដែលមមាញឹកខ្លាំងនោះ មន្ទីរពេទ្យមានបុគ្គលិកចំនួន ៧០ នាក់ និងការិយាល័យចំនួន ៦ ។ បច្ចុប្បន្ន អតិថិជនភាគច្រើនដែលមកមន្ទីរពេទ្យគឺជាស្ត្រីចំណាស់ ហើយតាយាយ ដែលត្រូវការជួសជុលតុក្កតាឲ្យចៅៗរបស់គាត់ »។
លោក Geoff បានបន្ថែមថា «នៅពេលអ្នកទាំងនោះនៅក្មេង ពួកគាត់មានតុក្កតាតែមួយប៉ុណ្ណោះ មិនងាយស្រួលបានថ្មីៗភ្លាមៗតាមហាងដូចសព្វថ្ងៃនេះទេ ។ អ៊ីចឹងហើយសម្រាប់ពួកគាត់ តុក្កតាទាំងនេះគឺមានន័យខ្លាំងណាស់ » ។
បើទោះជាបច្ចុប្បន្ន ខាងមន្ទីរពេទ្យមិនមានការមមាញឹកដូចមុន ប៉ុន្តែពួកគេនៅតែទទួលបានការពឹងឲ្យជួសជុលចន្លោះប្រមាណ ២០០ តុក្កតាក្នុងមួយសប្ដាហ៍ដែរ ៕
