ស្របពេលដែលប្រទេសហ្វីលីពីន កំពុងស្ដារខ្លួនពីការខូចខាតយ៉ាងធ្ងន់ធ្ងរដែលបង្កឡើងដោយព្យុះកំណាចទី ១៣ ឈ្មោះ Kalmaegi ស្រាប់តែខាងឧតុនិយមប្រកាសការព្យាករណ៍ពីព្យុះកំណាចមួយផ្សេងទៀត ដែលត្រៀមវាយប្រហារចូលប្រទេសបន្ទាប់ពីព្យុះ Kalmaegi។
ជាក់ស្ដែង បើតាមខាងរដ្ឋបាលបម្រើការផ្នែកបរិយាកាស ភូមិសាស្ត្រ និង តារាសាស្ត្រ ប្រចាំប្រទេសហ្វីលីពីន ( PAGASA) បានព្យាករណ៍ថា ព្យុះទីហ្វុង Kalmaegi បានបោកបក់ផុតប្រទេសហ្វីលីនជាផ្លូវការកាលពីថ្ងៃទី ០៦ ខែវិច្ឆិកា ឆ្នាំ ២០២៥ កន្លងទៅ។ យ៉ាងណាមិញ បញ្ហាដែលគួរឱ្យបារម្ភបំផុតនាពេលនេះគឺនៅភាគខាងកើតប្រទេសហ្វីលីពីន ដែលព្យុះត្រូពិចបានវិវឌ្ឍយ៉ាងលឿនទៅជាព្យុះដ៏ខ្លាំងក្លាមួយមានឈ្មោះជាអន្តរជាតិហៅថា Fung-Wong។
បច្ចុប្បន្ន ព្យុះនេះស្ថិតនៅចម្ងាយ ១ ៧១៥ គីឡូម៉ែត្រភាគខាងកើតនៃតំបន់ northeastern Mindanao បន្តផ្លាស់ទៅភាគពាយព្យក្នុងល្បឿនយឺត ១០ គីឡូម៉ែត្រក្នុងមួយម៉ោង។ កម្លាំងខ្យល់ជាមធ្យមរបស់ព្យុះនេះគឺ ៧៥ គីឡូម៉ែត្រក្នុងមួយម៉ោង និង អាចហក់ឡើងខ្លាំងពេញកម្លាំង ៩០ គីឡូម៉ែត្រក្នុងមួយម៉ោង។ នៅថ្ងៃទី ០៧ ខែវិច្ឆិកា នេះ ព្យុះនេះអាចនឹងកើនល្បឿនទៅជាព្យុះទីហ្វុង និង ក្លាយជាព្យុះកំណាចទី ១៤ ប្រសិនបើបោកបក់លើតំបន់ដែលបានព្យាករណ៍ទុកនោះ។
គួរបញ្ជាក់ដែរថា តាមការព្យាករណ៍ ព្យុះ Fung-Wong អាចនឹងមិនបោកបក់កាត់ភាគកណ្ដាលប្រទេសហ្វីលីពីនដូចព្យុះ Kalmaegi ឡើយ ប៉ុន្តែវានឹងបោកបក់សំដៅត្រង់ទៅតំបន់ Aurora ភាគឦសាន កោះ Luzon មុនបន្តផ្លាស់ទៅច្រកសមុទ្រកោះតៃវ៉ាន់៕
