ជាការពិតណាស់ ក្រោយពេលចេញសេចក្ដីប្រកាសលាលែងពីតំណែង MGI 2024 លើបណ្ដាញសង្គម IG រួចមក នាង Rachel Gupta ក៏បានធ្វើវីដេអូដែលមានរយៈពេលជិត ១ ម៉ោង រៀបរាប់រឿងលំបាកដែលខ្លួនជួបប្រទះអំឡុងពេលគ្រងមកុដ និង បកស្បែកស្ថាប័ន MGI ជុំវិញការងារដែលនាងធ្វើទាំងប៉ុន្មានគឺដើម្បីតែលុយ។
តាមរយៈវីដេអូ នាង Rachel Gupta រៀបរាប់ទាំងទឹកភ្នែកដោយលើកឡើងថា ការចេញមកបកស្រាយនេះគឺដើម្បីចង់ឱ្យនារីៗដទៃទៀតដែលមានក្ដីស្រមៃចចង់ចូលប្រកួតកម្មវិធីបវរកញ្ញានេះ កុំឱ្យជួបប្រទះបទពិសោធដូចជានាង។
Rachel បានរៀបរាប់ថា ៖ «…ខ្ញុំចេញមកបកស្រាយបែបនេះ ព្រោះថាមានមនុស្សស្រីច្រើនណាស់ជុំវិញពិភពលោកដែលមានក្ដីស្រមៃដូចនឹងខ្ញុំពេលខ្ញុំចូលប្រកួតកម្មវិធីនេះ ខ្ញុំចង់យកឈ្នះមកុដមកឱ្យប្រទេសឥណ្ឌា ហើយខ្ញុំពិតជាឈ្នះបានមែន។ ខ្ញុំចង់ឱ្យមនុស្សស្រីទាំងនោះបានដឹងពីការពិតពីស្ថាប័ននេះ ដឹងពីមនុស្សដែលបង្កើតប្រព័ន្ធនេះឡើង ហើយខ្ញុំក៏ចង់ឱ្យពួកគេយល់ពីអ្វីដែលពួកគេនឹងត្រូវរៀបចំឱ្យធ្វើ»។
នាងទម្លាយបន្ថែមទៀតថា ៖ «នៅពេលខ្ញុំចាប់ផ្ដើម នៅពេលខ្ញុំចូលរួម ហើយទាំងពេលដែលខ្ញុំឈ្នះ គឺមិនមែននរណាប្រាប់ខ្ញុំ ព្រមានខ្ញុំឡើយ ខ្ញុំត្រូវស្វែងយល់វាដោយខ្លួនឯង។ ហើយខ្ញុំមិនចង់ឱ្យស្រីៗយើងដទៃទៀតជួបនឹងបញ្ហាដូចជាខ្ញុំឡើយ ព្រោះថាប៉ុន្មានខែនេះគឺជាពេលវេលាអាក្រក់បំផុតក្នុងជីវិតខ្ញុំ។ ជីវិតខ្ញុំធ្លាក់ដល់បាត ដោយពេលវេលាចុងក្រោយដែលខ្ញុំមានភាពរីករាយពិតប្រាកដគឺនៅយប់ដែលខ្ញុំឈ្នះមកុដ។ ក្រោយចាប់តាំងពីថ្ងៃនោះមក ជីវិតខ្ញុំមានតែធ្លាក់ចុះទៅ កាន់តែអាក្រក់ទៅៗ។ ខ្ញុំចាយពេលវេលាប៉ុន្មានខែក្រោយនេះជាមួយនឹងភាព depress ភាពឯកោ។ ដូច្នេះហើយ ខ្ញុំចង់ឱ្យអ្នកទាំងអស់គ្នាដឹងការពិតគ្រប់យ៉ាង…»។
គួរឱ្យដឹងផងដែរថា ក្រៅពីរៀបរាប់ពីសម្ពាធគ្រប់យ៉ាងដែលទទួលបានពីការកាន់តំណែងរបស់ខ្លួន Rachel Gupta ក៏បានធ្វើការបកស្បែកស្ថាប័ន MGI ជុំវិញការធ្វើជំនួញគិតតែពីទាញប្រយោជន៍ គិតតែពីលុយ ដោយមិនខ្វល់ មិនគោរព មិនការពារ បវរកញ្ញាក្រោមស្ថាប័នរបស់ខ្លួននោះឡើយ៕
