ថ្មីៗនេះ ករណីគ្រោះថ្នាក់ដ៏កម្រមួយបានកើតឡើងនៅទីតាំងទេសចរណ៍មួយកន្លែងនៅមាត់ទន្លេ Liuyang ខេត្ត Hunan ប្រទេសចិន ដោយទស្សនីយភាពនៃការសម្ដែងដ្រូនក្នុងកម្មវិធីមួយ បានប្រែក្លាយទៅជា ទិដ្ឋភាពនៃការធ្លាក់ដុំអាចម៍ផ្កាយ រហូតបណ្ដាលឱ្យមនុស្សមកចូលរួមទស្សនាជាច្រើនត្រូវភ័យនាំគ្នារត់គេចពីដុំភ្លើង ខណៈខ្លះទៀតត្រូវយកកៅអីអង្គុយមកធ្វើជាខែលបាំងការពារខ្លួន។
ហេតុការណ៍ខាងលើនេះដែរ បានកើតឡើងកាលពីយប់ថ្ងៃទី ០២ ខែតុលា ឆ្នាំ ២០២៥ កន្លងទៅ ខណៈដ្រូនរាប់រយគ្រឿងកំពុងសម្ដែងនូវទិដ្ឋភាពដ៏អស្ចារ្យលើអាកាស ស្រាប់តែជួបបញ្ហារហូតឆាបឆេះធ្លាក់ពីលើអាកាសរាយប៉ាយមកក្រោមគួរឱ្យខ្លាចជាទីបំផុត។ តាមទិដ្ឋភាពស្ដែងៗដែលថតបានដោយមនុស្សនៅទីនោះ បានបង្ហាញឱ្យឃើញដុំភ្លើងទាំងដុំៗធ្លាក់ចុះពីលើអាកាសមក ខ្លះប៉ះទៅចំគុម្ពព្រៃក្បែរនោះរហូតឆាបឆេះឡើង ឯខ្លះទៀតធ្លាក់មកលើហ្វូងមនុស្សដែលកំពុងនាំគ្នារត់គេចរកកន្លែងសុវត្ថិភាព។
យ៉ាងណាមិញ បើតាមការបញ្ជាក់ពីខាងអ្នកគ្រប់គ្រងទីតាំងកម្សាន្តនោះបានឱ្យដឹងដែរថា ចំណុចដែលរងការឆាបឆេះគឺមិនខ្លាំងក្លានោះទេ ដោយខាងក្រុមការងារបានទប់ស្កាត់ដោយជោគជ័យ។ ជាមួយគ្នានោះ ដោយគ្រោះថ្នាក់នេះមិនធ្ងន់ធ្ងរ គឺមិនបានប៉ះពាល់ដល់កម្មវិធីចម្បងនៃទីតាំងកម្សាន្តនោះឡើយ ដោយសកម្មភាពកម្សាន្តនានានៅបន្តធ្វើតាមធម្មតា៕
