(វីដេអូ) ទំនងរបស់គេ! មិនដឹងតាំងពីពេលណា ស្ត្រីម្នាក់វារឡើងចូលដេកក្នុងធ្នើរដាក់វ៉ាលិសអ្នកដំណើរយ៉ាងរំភើប ផ្អើលគេឯងពេញយន្តហោះ

អ្នកដំណើរលើយន្តហោះ Southwest Airlines សហរដ្ឋអាមេរិក បាននាំគ្នាស្រឡាំងកាំងភ្ញាក់ផ្អើល ក្រោយឃើញស្ត្រីម្នាក់ឡើងទៅដេកលើកន្លែងដាក់វ៉ាលិសក្នុងយន្តហោះ យ៉ាងសុខស្រួលគ្មានខ្វល់ពីអ្នកដំណើរដទៃនៅអង្គុយខាងក្រោម។

សកម្មភាពរបស់ស្ត្រីនោះដែរត្រូវបានថត និង បង្ហោះក្នុងបណ្ដាញសង្គម TikTok ដោយមានអ្នកចូលមើលរាប់លាននាក់ ដែលបង្ហាញឱ្យឃើញច្បាស់ៗពីសកម្មភាពរបស់ស្ត្រីម្នាក់ បានទម្រេតខ្លួនដេកក្នុងកន្លែងដាក់វ៉ាលិស ប្រៀបដូចកំពុងដេកក្នុងបន្ទប់ ខណៈអ្នកដំណើរដទៃផ្សេងទៀត អង្គុយនៅលើកៅអីទូទៅធម្មតា។

តាមការចេញផ្សាយពីសារព័ត៌មាន The Mirror កាលពីថ្ងៃទី ០៩ ខែឧសភា ឆ្នាំ ២០២៤ បានឱ្យដឹងថា គ្មាននរណាបញ្ជាក់បានឡើយថា ស្ត្រីចម្លែករូបនោះគឺជាអ្នកដំណើរ ឬក៏ជាបុគ្គលិកបម្រើការលើយន្តហោះនោះ គ្រាន់តែបើតាមអ្នកចូលខមមិនក្រោមវីដេអូជាច្រើន បាននិយាយថាពួកគេធ្លាប់បានឃើញបុគ្គលិកបម្រើការលើយន្តហោះ ធ្លាប់សម្រាកបែបនេះ។

គួរឱ្យដឹងផងដែរថា ហេតុការណ៍ដ៏ហួសចិត្តបែបនេះ មិនមែនកើតឡើងលើកទីមួយនោះឡើយ ដោយកាលពីឆ្នាំ ២០១៩ អ្នកបម្រើការលើយន្តហោះរបស់ Southwest Airlines នេះ បានឡើងទៅដេកលើកន្លែងដាក់វ៉ាលិសនេះដូចគ្នា ប៉ុន្តែខាងជើងហោះហើរ បានលើកហេតុផលថា សកម្មភាពនោះគ្រាន់តែជាការលេងសើចប៉ុណ្ណោះ៕