នៅថ្ងៃទី ៣១ ខែមីនា ឆ្នាំ ២០២៥ នេះ តារាសម្ដែងប្រុស Kim Soo Hyun បានបង្ហាញវត្តមានជាសាធារណៈលើកដំបូងនៅពីមុខអ្នកកាសែត ជាមួយទឹកមុខស្រងូតស្រងាត់។ ខណៈរូបលោកបង្ហាញវត្តមានភ្លាម កាមេរ៉ារបស់អ្នកសារព័ត៌មានជាច្រើនបានផ្ដិតយករូបភាពឆ្វេចឆ្វាច ដោយក្រោយដើរចូលដល់តុ Kim Soo Hyun បានឱនក្បាល ៩០ ដឺក្រេជាការគោរពទៅក្រុមអ្នកសារព័ត៌មានមុនពេលអង្គុយចុះ។
ក្រោយពេលអង្គុយចុះរួចភ្លាមៗ ពាក្យពេចន៍ដំបូងដែល Kim Soo Hyun និយាយគឺពាក់ព័ន្ធនឹងរឿងអាស្រូវដ៏ក្ដៅគគុករវាងលោក និង អតីតតារាសម្ដែងស្រី Kim Sae Ron កន្លងមក ដោយលោកបានធ្វើការសុំទោសចំពោះអ្វីដែលគ្រប់គ្នាបានជួបប្រទះ។
Kim Soo Hyun បានថ្លែងថា៖ «សួស្ដី នេះគឺ Kim Soo Hyun។ ជាដំបូង ខ្ញុំសុំធ្វើការអភ័យទោស ព្រោះតែខ្ញុំធ្វើឱ្យមនុស្សជាច្រើនកំពុងតែរងទុក្ខលំបាកនៅពេលនេះ ហើយខ្ញុំមានអារម្មណ៍ថាអ្នកដែលបានចាកចេញទៅគឺមិនអាចទៅបានស្ងប់សុខឡើយដែលជាហេតុរឹតតែធ្វើឱ្យខ្ញុំមានអារម្មណ៍ថាអាក្រក់ខ្លាំង»។
លោកបានបន្ថែមទៀតថា៖ «ខ្ញុំគិតថាខ្លួនឯងជាមនុស្សកំសាក។ ក្នុងរយៈពេលកន្លងមកនេះ ខ្ញុំតែងតែផ្ដោតលើការរក្សាអ្វីដែលខ្លួនឯងមាន។ ខ្ញុំមិនដែលខ្វល់ពីក្ដីមេត្តាដែលមានមកលើខ្ញុំ ហើយខ្ញុំភ័យខ្លាចបាត់បង់អ្វីៗគ្រប់យ៉ាង។ ខ្ញុំបានត្រឹមតែលាក់ខ្លួន ដូច្នេះហើយវាទាមទារពេលយូរទម្រាំខ្ញុំអាចបង្ហាញខ្លួននៅទីនេះ។ ខ្ញុំធ្លាប់គិតថាតើនឹងមានរឿងអ្វីកើតឡើងប្រសិនបើខ្ញុំបើកសន្និសីទកាសែតនៅពេលរឿងចាប់ផ្ដើមដំបូងៗ ដែលខ្ញុំមិនបង្កឱ្យមានការរងទុក្ខពិបាកដល់អ្នកគាំទ្រដែលស្រឡាញ់ និង គាំទ្រខ្ញុំ និង បុគ្គលិកនៅក្រុមហ៊ុនរបស់ខ្ញុំ។
រាល់ពេលដែលមានការទម្លាយម្ដងៗពាក់ព័ន្ធខ្ញុំជាមួយនឹងអ្នកដែលបានចាកចេញទៅនោះ ខ្ញុំតែងគិតថា «ខ្ញុំនឹងប្រាប់គ្រប់គ្នាពីរឿងគ្រប់បែបយ៉ាងទាំងអស់នៅថ្ងៃស្អែក។ ខ្ញុំនឹងទម្លាយគ្រប់បែបយ៉ាង ហើយខ្ញុំនឹងបញ្ចប់រឿងមួយនេះ»។ ប៉ុន្តែរាល់ពេលដែលគិត ចុងក្រោយខ្ញុំនៅតែស្ទាក់ស្ទើរ ខ្ញុំភ័យខ្លាចពីលទ្ធផលចុងក្រោយនៃការសម្រេចចិត្តរបស់ខ្ញុំ។ ចុះបើខ្ញុំធ្វើឱ្យរឿងកាន់តែរញ៉េរញ៉ៃទៅ? ពេលរឿង «Queen of Tears» ចាក់ផ្សាយ ហើយអ្នកដែលបានចាកចេញ (Kim Sae Ron) បង្ហោះរូបនាងជាមួយខ្ញុំ ខ្ញុំមានអារម្មណ៍ដូចគ្នា។ នាងហើយនឹងខ្ញុំគឺបានមានទំនាក់ទំនងជាមួយគ្នាបានប្រហែល ១ ឆ្នាំ កាលពី ៥ ឆ្នាំមុន (៤ ឆ្នាំមុន Queen of Tears ចេញផ្សាយ)។ ទោះជាយ៉ាងណា នៅពេលនោះ ខ្ញុំបានបដិសេធទំនាក់ទំនងរបស់យើង។ ខ្ញុំជឿថាខ្ញុំពិតជាសមនឹងទទួលរងការរិះគន់ចំពោះអ្វីដែលខ្ញុំបានធ្វើ»៕
ប្រភព៖ Koreaboo
