ទេពហត្ថា ដឹកនាំដោយលោក Xavier de Lauzanne ភាពយន្តបង្ហាញអំពីប្រវត្តិនៃរបាំព្រះរាជទ្រព្យ នឹងចាក់បញ្ចាំងនៅរោងភាពយន្ត ចាប់ពីថ្ងៃទី ១ មេសាតទៅ

The Perfect Motion ឬ «ទេពហត្ថា» គឺជាភាពយន្ដឯកសារដំបូងគេបង្អស់ដែលទទួលបានមូលនិធិ និង ផលិតក្នុងស្រុកសម្រាប់បញ្ចាំងក្នុងរោងភាពយន្ត ហើយភាពយន្តនេះនឹងចាក់បញ្ចាំងក្នុងរោងភាពយន្តទូទាំងប្រទេសកម្ពុជា ចាប់ពីថ្ងៃទី ១ មេសា ឆ្នាំ ២០២៣ នេះតទៅហើយ។ ខ្សែភាពយន្តនេះមានសាច់រឿងពីរ ៖ ទីមួយទៅលើការបង្កើត «នាងវឌ្ឍនាទេវី» របស់សម្តេចព្រះរៀម នរោត្តម បុប្ផាទេវី (ស្នាព្រះហស្ដចុងក្រោយរបស់ទ្រង់) និង សាច់រឿងមួយទៀតអំពីប្រវត្តិនៃរបាំព្រះរាជទ្រព្យចាប់ពីឆ្នាំ ១៩០៦។

ខ្សែភាពយន្តនេះបានចាប់យកខ្លឹមសារនៃទម្រង់សិល្បៈដ៏ស្រស់ស្អាត ជាមួយនឹងរូបភាពដ៏ទាក់ទាញ និង សាច់រឿងដ៏គួរឱ្យចាប់អារម្មណ៍។ អ្នករបាំជំនាន់ក្រោយ និង អ្នករបាំជើងចាស់ បានចែករំលែកសក្ខីភាពដ៏គួរឱ្យរំភើប ចំពោះការលះបង់ក្នុងជីវិតរបស់ពួកគេក្នុងការផលិតស្នាដៃដ៏ល្អឥតខ្ចោះ និង ធានាថានឹងបន្តទៅដល់ជំនាន់ក្រោយៗ ទោះបីមានសោកនាដកម្មក្នុងប្រវត្តិសាស្ត្រកម្ពុជាក៏ដោយ។ តាមរយៈសាច់រឿងរបស់ពួកគេ ទស្សនិកជននឹងស្វែងយល់កាន់តែច្រើនឡើង ថាតើរបាំព្រះរាជទ្រព្យបានកំណត់រូបរាងរបស់វប្បធម៌ និង អត្តសញ្ញាណប្រទេសកម្ពុជាទៅតាមពេលវេលាយ៉ាងដូចម្ដេច។ ដូចលោក Rodin ធ្លាប់បានលើកឡើងថា ៖ «តាមរយៈចលនា ទើបយើងអាចយល់ច្បាស់អំពីភាពស្រស់ស្អាត»។

លោក Xavier de Lauzanne អ្នកដឹកនាំខ្សែភាពយន្ត ទេពហត្ថា បាននិយាយថា ៖ «ខ្ញុំគិតថាវាពិតជាសំខាន់ណាស់ ក្នុងការចែករំលែកគម្រោងមួយនេះទៅកាន់អ្នកដែលមានការយល់ដឹងកាន់តែស៊ីជម្រៅលើជីវិតសិល្បៈក្នុងប្រទេសកម្ពុជា និង មានទស្សនៈគំនិតច្រើនជាងខ្ញុំ។ ហេតុនេះហើយ ខ្ញុំបានសាកសួរលោក Pierre Kogan ជាអ្នកស្រឡាញ់សិល្បៈ និង ជាអ្នកផលិតខ្សែភាពយន្ត ដែលបានរស់នៅក្នុងប្រទេសកម្ពុជារយៈពេល ៨ ឆ្នាំ ដើម្បីសរសេរសាច់រឿងនេះជាមួយខ្ញុំ។ ការសហការនេះពិតជាមានលទ្ធផលល្អ ហើយពួកយើងសង្ឃឹមថានឹងបង្ហាញខ្សែភាពយន្តដែលសមនឹងគុណតម្លៃនៃសាច់រឿងដ៏អស្ចារ្យនេះ។ យើងពិតជាចង់ផលិតភាពយន្តមួយដែលចាប់យកទាំងភាពស្រស់ស្អាតនៃរបាំក្បាច់បុរាណរបស់ប្រទេសកម្ពុជា និង សាច់រឿងដ៏មិនគួរឱ្យជឿនៃប្រវត្តិសាស្ត្រថ្មីៗនៃរបាំនេះ។ វាពិតជាសំខាន់ណាស់ក្នុងការឧទ្ទិសដល់សិល្បករដែលប្រឈមមុខនឹងសង្គ្រាម ការបំផ្លិចបំផ្លាញ និង ភាពក្រខ្សត់ ដែលមានទឹកចិត្ត និង ភាពក្លាហានក្នុងការបង្រៀន និងធ្វើឱ្យសិល្បៈមានជីវិតឡើងវិញ នាំឱ្យក្លាយជាពន្លឺនៃក្ដីសង្ឃឹម ការងើបឡើងវិញ និង ការកសាងឡើងវិញ»។

លោក Pierre Kogan បានបន្ថែមទៀតថា ៖ «ប្រជាជនកម្ពុជាស្ទើរគ្រប់រូបសុទ្ធតែដឹងអំពី «របាំអប្សរា» និង ប្រហែលអាចសម្ដែងកាយវិការមួយ ឬ ពីរ។ ប៉ុន្តែមិនសូវមានអ្នកបានចូលរួមទស្សនាការសម្ដែងរបាំព្រះរាជទ្រព្យទេ។ សម្រាប់មនុស្សភាគច្រើន ប្រវត្តិរបស់របាំព្រះរាជទ្រព្យមិនសូវមានគេដឹងទេ រួមទាំងមូលហេតុដែលរបាំនេះទាក់ទាញមនុស្សជាច្រើនចូលទស្សនានៅឯរោងមហោស្រពនៅបរទេស។ យើងសង្ឃឹមថា ភាពយន្ត ទេពហត្ថា នឹងធ្វើឱ្យប្រជាជនកម្ពុជាមានមោទកភាពចំពោះវប្បធម៌របស់ពួកគេបន្ថែមទៀត ដែលនឹងរួមចំណែកធ្វើឱ្យកិត្តិនាមនៃរបាំនេះរីកសុសសាយពេញពិភពលោក»។

លោក De Lauzanne បានលើកឡើងទៀតថា ៖ «ទេពហត្ថា គឺជាដំណើរដ៏មហាអស្ចារ្យដែលមានរយៈពេល ៥ ឆ្នាំ។ ចាប់តាំងពីការបង្កើតគំនិតរហូតដល់នាដ្យកថា និង ចាប់ពីការជ្រើសរើសតួអង្គរហូតដល់ផលិតកម្ម វាពិតជារឿងដែលល្អអស្ចារ្យ គួរឱ្យរំភើប និង មិនគួរឱ្យជឿ ដូចសាច់រឿងបញ្ចាំងក្នុងខ្សែភាពយន្តនេះ»។

កម្មវិធីសម្ពោធ

កាលនៅថ្ងៃទី ២៦ ខែមីនា ឆ្នាំ ២០២៣ ភាពយន្ត ទេពហត្ថា បានចាក់បញ្ចាំងជាលើកដំបូងនៅសាលមហោស្រពចតុមុខ ដោយមានវត្តមានរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី និង សម្តេចព្រះមហាក្សត្រី នរោត្តម មុនិនាថ សីហនុ។ នេះពិតជាកិតិ្តយសណាស់សម្រាប់អ្នកដែលបានរួមចំណែកក្នុងផលិតកម្មនេះ ហើយវាបង្ហាញអំពីសារសំខាន់នៃខ្សែភាពយន្តនេះ។

បន្ទាប់ពីការចាក់បញ្ចាំងពិសេសនេះ ខ្សែភាពយន្ត ទេពហត្ថា នឹងចាក់បញ្ចាំងទូទាំងប្រទេសកម្ពុជាចាប់ពីថ្ងៃទី ១ ខែមេសា ឆ្នាំ ២០២៣។ បន្ទាប់ពីនោះនឹងមានការចាក់បញ្ចាំងជាសាធារណៈនៅតាមបណ្ដាខេត្តផ្សេងៗ។ សម្រាប់ខ្សែភាពយន្តនេះដែរ មានពីរភាសា ៖ ភាសាខ្មែរ ដែលអាចចូលទស្សនាបានស្ទើរគ្រប់រោងភាពយន្ត និង ភាសាអង់គ្លេសសម្រាប់ទស្សនិកជនជាជនជាតិបរទេស។

«ទេពហត្ថា» រយៈពេល ៨៧ នាទី ដឹកនាំដោយលោក Xavier de Lauzanne និពន្ធដោយលោក Xavier de Lauzanne និង លោក Pierre Kogan។ សហការជាមួយ ៖ ព្រះអង្គម្ចាស់ ស៊ីសុវត្ថិ តេសសូ, ព្រឹទ្ធាចារ្យ ព្រឿង ឈៀង, លោក លីម ស៊ីលវាំង, អ្នកស្រី វ័ន សាវ៉ៃ, អ្នកនាង សេរី វណ្ណកុសន, អ្នកនាង សុខ ណាលីស, សុភីលីន ជាម ហ្សាភារ៉ូ & Lucie Labbé៕

ចំពោះព័ត៌មានបន្ថែម៖
លេខទូរស័ព្ទ៖ +855 10 600 848 – Ratana Cheng
អ៊ីម៉ែល៖ ratana@westecmedia.com
ហ្វេសប៊ុក៖ www.facebook.com/theperfectmotionmovie