ធ្ងន់-កហើយ! ឈៀងម៉ៃ ក្លាយជាទីក្រុងមានខ្យល់ពុលបំផុតលើពិភពលោកនាពេលបច្ចុប្បន្ន

នៅព្រឹកថ្ងៃទី ៣១ ខែមីនា ឆ្នាំ ២០២៣ នេះ ខេត្តឈៀងម៉ៃ ប្រទេសថៃ ត្រូវបានគេរាយការណ៍ថាក្លាយជាទីក្រុងដែលមានខ្យល់ពុលក្នុងបរិយាកាសបំផុតលើពិភពលោកនាពេលបច្ចុប្បន្ន ក្រោយផ្សែងអ័ព្ទក្រាស់ឃ្មឹកបានសាយភាយពេញខេត្ត ហើយកម្រិតគុណភាពខ្យល់បានឡើងខ្ពស់ជាង AQI 222។ នេះជាកម្រិតខ្យល់ពុលខ្ពស់បំផុតប្រចាំប្រវត្តិសាស្ត្រខេត្តឈៀងម៉ៃ ដោយគេសង្ស័យថាអាចបណ្ដាលមកពីរលកកម្ដៅ និង ឥទ្ធិពលនៃភ្លើងឆេះព្រៃតាមតំបន់ផ្សេងៗ។

មន្ត្រីជំនាញផ្នែកសុខភាពថៃបានបញ្ជាក់ថា ផ្សែងអ័ព្ទក្នុងបរិយាកាសក្នុងខេត្តឈៀងម៉ៃគឺប៉ះពាល់សុខភាពជាខ្លាំង ដោយនៅពេលអ្នកប៉ះពាល់ ឬ ស្រូបវាចូល វានឹងធ្វើឱ្យឆេះឆួលក្នុងច្រមុះ ហើយអាចប៉ះពាល់ដល់ភ្នែកហៀរទឹកភ្នែកចេញក្រៅ។

បច្ចុប្បន្នអាជ្ញាធរខេត្តឈៀងម៉ៃកំពុងត្រៀមម៉ាស់ការពារចំនួន ១០ ម៉ឺនដុំ ដើម្បីចែកជូនប្រជាពលរដ្ឋទូទាំងខេត្ត ខណៈពេលដែលសាលាជាច្រើនដែលកំពុងបើកបង្រៀនត្រូវបានរៀបចំចែកចាយរួចជាស្រេច ហើយធ្វើការកែប្រែដោយសិក្សា និង ធ្វើសកម្មភាពក្នុងថ្នាក់រៀនមានម៉ាស៊ីនត្រជាក់ ជាមួយម៉ាស៊ីនបន្សុតខ្យល់ ហើយហាមក្មេងៗចេញក្រៅអគារជាដាច់ខាតបើពុំចាំបាច់។ ប្រសិនបើស្ថានភាពកាន់តែធ្ងន់ធ្ងរ អគារធ្វើការ និងសាលារៀនប្រចាំខេត្តនឹងត្រូវធ្វើការបិទជាបណ្ដោះអាសន្ន៕