ទឹកធ្លាក់មួយកន្លែងនៅខេត្តកំពង់ឆ្នាំង មានទេសភាពស្អាត កំពុងសំងំលាក់សម្រស់ធម្មជាតិ មិនទាន់មានអ្នកស្គាល់ច្រើន

ខេត្តកំពង់ឆ្នាំង ស្ថិតនៅចម្ងាយប្រមាណជា ៩០ គីឡូម៉ែត្រពីរាជធានីភ្នំពេញ ត្រូវបានប្រជាជនខ្មែរ ក៏ដូចជាភ្ញៀវទេសចរស្គាល់ថាជាខេត្តល្បីល្បាញខាងផលិតក្អមឆ្នាំង មានគុណភាពល្អ ដែលធ្វើអំពីដី ថែមទាំងជាខេត្តមួយសម្បូរទៅដោយកន្លែងទេសចរណ៍បែបប្រវត្តិសាស្រ្តមានដូចជា តំបន់ភ្នំ និង តំបន់ប្រាសាទរួមទាំងតំបន់លម្ហែកែច្នៃថ្មី ស្រស់ត្រកាលអនេក។

ថ្មីៗនេះ អ្នកនិយមលេងបណ្ដាញសង្គមហ្វេសប៊ុកហាក់មានការចាប់អារម្មណ៍យ៉ាងខ្លាំងនូវតំបន់ទេសចរណ៍មួយកន្លែង ដែលមានឈ្មោះថា «សហគមន៍អេកូទេសចរណ៍ ទឹកធ្លាក់ថ្មក្រាល» ស្ថិតនៅក្នុងខេត្តកំពង់ឆ្នាំង ដែលមិនឆ្ងាយប៉ុន្មានពីភ្នំពេញ។

សហគមន៍អេកូទេសចរណ៍ ទឹកធ្លាក់ថ្មក្រាល ក៏ជាកន្លែង ដែលមានភ្ញៀវទេសចរអាចទៅទស្សនា លំហែកាយ នៅពេលសម្រាកពីការងារ ឬ ថ្ងៃចុងសប្ដាហ៍ ដើម្បីស្រស់ស្រូបអាហារជុំគ្រួសារ ឬ ជួបជុំមិត្តភក្តិ នៅក្រោមម្លប់ឈើត្រឈឹងត្រឈៃ ជាមួយនឹងទឹកធ្លាក់ដ៏សែនត្រជាក់លាងជម្រះនូវភាពនឿយហត់។

គួរបញ្ជាក់ដែរថា ទឹកធ្លាក់ថ្មក្រាល មានទីតាំងស្ថិតនៅភូមិកោះក្ទម្ព ឃុំជៀប ស្រុកទឹកផុស មានចម្ងាយប្រមាណ ៥៧ គីឡូម៉ែត្រពីក្រុងកំពង់ឆ្នាំង៕

រូបភាពដោយ ៖ រដ្ឋបាលខេត្តកំពង់ឆ្នាំង និង ដើរថត der thot