កុំច្រឡំនៅកំពង់ចាមគ្មានកន្លែងដើរស្អាតៗ មើលតែកន្លែងមួយនេះរៀបចំតុបតែងភ្លឹងៗ ប្លង់ថតរូបថ្មីៗ ស្អាតទាក់ទាញណាស់

កន្លែងលម្ហែ ស្មៅទន្លេ ដែលមានទីតាំងនៅក្នុងទឹកដីខេត្តកំពង់ចាម ថ្មីៗនេះបានរៀបចំកែកុនសម្រស់បន្ថែមជាថ្មីឱ្យកាន់តែទាក់ទាញ ដុតអារម្មណ៍មហាជន ឱ្យចង់ទៅទស្សនាកម្សាន្ត ជាពិសេសទៅថតរូបលេង សម្រាប់ប្រិយមិត្តដែលចូលចិត្ត និងស្នេហាវិស័យថតរូប។

រមណីយដ្ឋាន និង អាហារដ្ឋាន ស្មៅទន្លេ ដែលកំពុងទទួលបានការចាប់អារម្មណ៍នេះ គឺមានទីតាំងស្ថិតនៅក្នុង ភូមិទី ២ សង្កាត់វាលវង្ស ក្រុងកំពង់ចាម ខេត្តកំពង់ចាម នៅជាប់នឹងមាត់ទន្លេមេគង្គតែម្ដង ស្ថិតត្រង់ចំណុចជិតគល់ស្ពាន ទៅកោះប៉ែន។

ទីតាំងដ៏ស្រស់ត្រកាលជិតមាត់ទន្លេនេះ មានបម្រើជូនសេវាកម្មម្ហូបអាហារ ដែលមានរសជាតិឆ្ងាញ់ពិសា ថែមទាំងមានការរៀបចំជាសួនច្បារកែលម្អថ្មីៗ យ៉ាងស្រស់ស្អាត ប្លែកភ្នែក ប្លែកអារម្មណ៍ក្រៃលែង។

អ្វីដែលកាន់តែគួរឱ្យចាប់អារម្មណ៍ទៀតនោះ ក្រោយពីការកែលម្អថ្មីនេះ គេសង្កេតឃើញមានប្លង់ថតរូបថ្មីយ៉ាងទាក់ទាញឈ្មោះ «កូនក្រមុំអ្នកទន្លេ» ព្រមទាំងមានផ្កាថ្មីៗជាច្រើនពណ៌ ត្រូវបានបញ្ឈរត្រៀបត្រា នៅបរិវេណតំបន់លម្ហែខាងលើ ដែលញ៉ាំងបរិយាកាសឱ្យប្រិយមិត្តដែលបានទៅដល់ទីនោះ សប្បាយរីករាយ ក្នុងការថតរូបលេងកម្សាន្ត ទុកជាអនុស្សាវរីយ៍ផងដែរ៕

រូបភាព ៖ ស្មៅទន្លេ