សូមប្រុងប្រយ័ត្ន! នេះជាល្បិចបច្ចេកវិទ្យាធំៗទាំង ៥ ដែលជនខិលខូច តែងប្រើក្នុងឆ្នាំ ២០២២

បច្ចេកវិទ្យាឌីជីថល និងបណ្តាញអ៊ីនធឺណិត បានក្លាយជាចលករដ៏មានសក្តានុពលសម្រាប់មនុស្សក្នុងសកលលោកទាំងមូល។ ទន្ទឹមនឹងការរីកចម្រើននៃបច្ចេកវិទ្យាឌីជីថល បញ្ហាប្រឈមក៏បានកំពុងកើតឡើងជារៀងរាល់ថ្ងៃផងដែរ ដោយជនខិលខូច ឬ ឧក្រិដ្ឋជន បានទាញយកនូវបច្ចេកវិទ្យា ធ្វើជាមធ្យោបាយក្នុងការប្រព្រឹត្តិបទល្មើស។

តួយ៉ាង មានដូចជាការវាយប្រហារតាមបណ្តាញអ៊ីនធឺណេត អំពើឆបោកប្រាក់ អំពើលួចយកនូវទិន្នន័យ អំពើក្លែងអត្តសញ្ញាណ និងអំពើស៊ើបការសម្ងាត់ផ្សេងៗជាដើម។

ទន្ទឹមទៅនឹងរឿងនេះ ថ្មីៗនេះ នាយកដ្ឋានព័ត៌មានវិទ្យា ក្រសួងមហាផ្ទៃ បានបង្ហាញពីប្រភេទនៃការវាយប្រហារបច្ចេកវិទ្យាធំៗ ចំនួន ៥ អំឡុងឆ្នាំ ២០២២ ដែលមានដូចជា៖

១. ការដាក់ធ្នាក់លួចយកនូវព័ត៌មាន (Phishing Attack)

ឧក្រិដ្ឋជនប្រើប្រាស់កម្មវិធីបណ្តាញសង្គម ឬ អ៊ីម៉ែល ក្នុងការបញ្ឆោតជនរងគ្រោះចូលទៅកាន់គេហទំព័រក្លែងបន្លំ និង លួចយកនូវព័ត៌មាន។

២. ការខលទូរសព្ទបញ្ឆោតលួចព័ត៌មាន (Vishing Attack)

ឧក្រិដ្ឋជន ធ្វើការខលចូលទូរសព្ទរបស់ជនរងគ្រោះ និង បានប្រើប្រាស់បច្ចេកទេសវិស្វកម្មបណ្តាញសង្គម (Social Engineering) ដើម្បីឆបោកជនរងគ្រោះលួចយកនូវព័ត៌មាន។

៣. ការវាយប្រហារផ្អាកដំណើរការប្រព័ន្ធ (Distributed Denial of Service Attacks)

ឧក្រិដ្ឋជន ប្រើប្រាស់ឧបករណ៍បច្ចេកវិទ្យា ដែលឆ្លងនូវមេរោគ និងបញ្ជាឧបករណ៍ទាំងនោះដើម្បីចូលរួមប្រតិបត្តិការវាយប្រហារផ្អាកដំណើរការប្រព័ន្ធ។

៤. ការលួចអត្តសញ្ញាណ (Identity Theft) ឧក្រិដ្ឋជនលួចយកនូវអត្តសញ្ញាណជនរងគ្រោះ ពីកម្មវិធីបណ្តាញទំនាក់ទំនងសង្គម ការជ្រៀតចូលប្រព័ន្ធ ឬឧបករណ៍ប្រើប្រាស់របស់ជនរងគ្រោះ បន្ទាប់មកយកអត្តសញ្ញាណទាំងនោះទៅប្រើប្រាស់ ឬលក់ ឬចែកចាយលើទីផ្សារងងឹត។

៥. មេរោគជម្រិតទារប្រាក់ (Ransomware Attacks)

ឧក្រិដ្ឋជនប្រើប្រាស់បច្ចេកទេស Phishing ឬជាការបង្កត់មេរោគក្នុងឯកសារ (File) ដែលបានបង្ហោះចែកចាយលើបណ្តាញអ៊ីនធឺណិត ដូចជាឯកសារកម្មវិធី ឬឯកសារវីដេអូ ជាដើម៕

ប្រភព ៖ នាយកដ្ឋានព័ត៌មានវិទ្យា ក្រសួងមហាផ្ទៃ