មោទកភាព! កីឡាការិនីខ្មែរ កាំង មុយនីន ឈ្នះមេដាយមាសផ្នែកហែលទឹក នៅប្រទេសថៃ
សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី ០៤ ខែកញ្ញា ឆ្នាំ ២០២២ បានបង្ហោះសារចូលរួមអបអរសាទរកីឡាការិនី កាំង មុយនីន ដែលទទួលបានជ័យលាភីមេដាយ ២ គ្រឿង មាស ១ គ្រឿង លើប្រភេទវិញ្ញាសារ Women 400m Bifins និង សំរឹទ្ធ ១ គ្រឿង លើប្រភេទវិញ្ញាសា Women 50m Bifins ក្នុងការប្រកួត Finswimming’s World Cup Round Swimming Pool 2022 នៅព្រះរាជាណាចក្រថៃ។
ការប្រកួតនេះ ផ្ដើមឡើងដោយសមាគមកីឡាក្រោមទឹកប្រទេសថៃ (Association of Thailand Underwater Sports) បានអញ្ជើញសហព័ន្ធខ្មែរកីឡាហែលទឹក ទៅចូលរួមការប្រកួត Finswimming’s World Cup Round Swimming Pool 2022 ដែលនឹងប្រព្រឹត្តទៅចាប់ពីថ្ងៃទី ០១ ដល់ថ្ងៃទី ០៥ ខែកញ្ញា ឆ្នាំ ២០២២ នៅខេត្តភូកេត ប្រទេសថៃ។
ទន្ទឹមនោះ រហូតមកទល់ពេលនេះ ចំនួនមេដាយទាំងអស់ដែលកីឡាការិនី កាំង មុយនីន របស់កម្ពុជាយើងទទួលបានពីការប្រកួតនេះ គឺមានចំនួន ០៤ គ្រឿង រួមមានមេដាយមាស ៣ គ្រឿង និង មេដាយ សំរឹទ្ធ ១ គ្រឿងក្នុងការប្រកួត Finswimming’s World Cup Round Swimming Pool 2022 នៅព្រះរាជាណាចក្រថៃ៕
