ងាយៗ! ធ្វើតាមតែប៉ុន្មានចំណុចនេះ ត្រីប្រឡាក់មិនធុំក្លិនស្អុយទេ ទោះទុកយូរក៏ដោយ

កាលពីប៉ុន្មានថ្ងៃមុន «ប្រជាប្រិយ» បានប្រាប់លោកអ្នកពីរបៀបធ្វើត្រីគ្រប់ប្រភេទដើម្បីបំបាត់ក្លិនឆ្អាបរួចមកហើយ ថ្ងៃនេះយើងនឹងមកបង្ហាញលោកអ្នកនូវវិធីងាយៗដើម្បីប្រឡាក់ត្រីទុកមិនឲ្យមានក្លិនស្អុយវិញម្តង ទោះជាត្រូវទុកយូរយ៉ាងណាក៏ដោយ ។

ការប្រឡាក់ត្រី

១) នៅពេលយើងចង់ធ្វើត្រីប្រឡាក់ទុកចៀន ឬ អាំងពិសានៅថ្ងៃក្រោយ (ជាពិសេស ត្រីអណ្តែង ត្រីកន្ធរ-ល-) នោះ យើងតែងតែជួបនឹងបញ្ហាសាច់ត្រីឡើងហើម និង ធុំក្លិនស្អុយ ធ្វើឲ្យលែងចង់ទទួលទាន តែសូមស្រ្តីមេផ្ទះទាំងឡាយកុំបារម្ភអី វិធីថែរក្សាទុកត្រីប្រឡាក់ឲ្យបានយូរ និង មិនធុំក្លិនស្អុយនោះគឺនៅពេលដែលលោកអ្នកធ្វើត្រីទាំងនោះស្អាតហើយ ចូរលាងនឹងទឹកឲ្យបានស្អាតប្រមាណជា ២ ទៅ ៣ ទឹក រួចហើយយកមកច្របល់ប្រឡាក់ជាមួយនឹងអំបិល ស្ករ និង ប៊ីចេង (តាមរសជាតិដែលអ្នកចូលចិត្ត) ទុកចោលប្រមាណជា ២ ទៅ ៦ ម៉ោង ។
២) លុះដល់ពេលគ្រប់កំណត់ហើយ ចូរយកទៅដាក់សំដឹលហាលឲ្យត្រូវទាំងខ្យល់ និង ថ្ងៃឲ្យបានប្រមាណជា ៦ ទៅ ១០ ម៉ោង តែប៉ុណ្ណឹងត្រីប្រឡាក់ទាំងនោះនឹងលែងសូវធុំក្លិនអាក្រក់រំខានច្រមុះយើងនៅពេលយកមកអាំង ឬ ចៀនពិសាហើយ ។

វិធីរក្សាទុក

ការរក្សាទុកក៏មិនមែនជារឿងលំបាកដែរ គឺយកត្រីដែលហាលស្ងួតហើយនោះមករុំនឹងក្រដាស់អនាម័យឲ្យបាន ២ ជាន់ (រុំឲ្យជិត) នៅពេលរុំស្រេចហើយ សូមយកក្រដាសកាសែតមករុំខ្ចប់មួយជាន់ទៀត រួចហើយដាក់ចូលក្នុងថង់ចងមាត់ឲ្យជិត រួចយកទៅទុកទូទឹកកកជាការស្រេច ៕

ប្រភព៖ House Wife – ស្ត្រីមេផ្ទះ

រូបភាព៖ fb

អត្ថបទដោយ​៖ Vathey