កាលពីថ្ងៃទី ១២ ខែមិថុនា ឆ្នាំ ២០២៥ កន្លងទៅ យន្តហោះក្រុមហ៊ុន Air India មួយគ្រឿង ដឹកមនុស្សសរុប ២៤២ នាក់ ដែលហោះឆ្ពោះទៅទីក្រុង ឡុងដុង ប្រទេសអង់គ្លេស បានធ្លាក់ភ្លាមៗក្រោយហោះចេញពីព្រលានយន្តហោះ Ahmedabad រដ្ឋ Gujarat ប្រទេសឥណ្ឌា។
ក្នុងហេតុការណ៍ធ្លាក់ផ្ទុះឆេះយន្តហោះដ៏រន្ធត់នេះដែរ ខាងអាជ្ញាធរគ្មានសង្ឃឹមថានឹងរកឃើញមានអ្នកនៅរស់រានជីវិតឡើយ តែយ៉ាងណាមិញ មានបុរសជាអ្នកដំណើរម្នាក់ឈ្មោះ Vishwash Kumar Ramesh អាយុ ៤០ ឆ្នាំ ជាអ្នកដំណើរអង្គុយកៅអីលេខ 11A បានមានសំណាងក្នុងមួយលានគ្រោះថ្នាក់រួចផុតជីវិតពីហេតុការណ៍ធ្លាក់យន្តហោះនេះ។
តាមការរៀបរាប់ហេតុការណ៍ទាំងខ្លួនកំពុងព្យាបាលលើគ្រែពេទ្យ លោក Vishwash Kumar Ramesh បាននិយាយថា ៖ «ប្រមាណជា ៣០ វិនាទីក្រោយហោះចេញ ខ្ញុំបានឮសំឡេងលាន់ខ្លាំង ហើយយន្តហោះក៏ចាប់ផ្ដើមដាំក្បាលចុះក្រោម។ រឿងហេតុគ្រប់យ៉ាងកើតឡើងលឿនណាស់។ ពេលខ្ញុំដឹងខ្លួនឡើង ឃើញសាកសពមនុស្សនៅជុំវិញខ្លួន។ ខ្ញុំភ័យស្លន់ ងើបឈរឡើងហើយរត់ចេញទៅ។ បំណែកយន្តហោះគឺឃើញនៅគ្រប់កន្លែង ហើយក៏មាននរណាម្នាក់មកចាប់ខ្ញុំ យកខ្ញុំចូលរថយន្តសង្គ្រោះនាំមកមន្ទីរពេទ្យនេះ»។
គួរឱ្យដឹងថា តាមការចេញផ្សាយរបស់សារព័ត៌មាន India Today បុរសជាអ្នកដំណើរដែលរួចផុតជីវិតខាងលើគឺអង្គុយកៅអីក្បែរច្រកទ្វារអាសន្ន ដោយលោកបានលោតចុះពីលើយន្តហោះមុនយន្តហោះធ្លាក់ផ្ទុះឆេះលើដី៕
