ភ្នំភ្លើង Lewotobi Laki-laki លើកោះ Flores ប្រទេសឥណ្ឌូនេស៊ី បានផ្ទុះកាលពីយប់ថ្ងៃទី ១៤ ខែតុលា ឆ្នាំ ២០២៥ កន្លងទៅ និង ផ្ទុះម្ដងទៀតនៅវេលាម៉ោង ១ និង ៣៥ នាទីយប់រំលងអធ្រាត្រឈានចូលថ្ងៃទី ១៥ ខែតុលា ឆ្នាំ ២០២៥ នេះ បាញ់ជះផេះឡើងលើអាកាសក្នុងកម្ពស់ ១០ គីឡូម៉ែត្រ នេះបើតាមការបញ្ជាក់ពីខាងអាជ្ញាធរក្នុងតំបន់។
រូបតំណាង
បច្ចុប្បន្ន មិនទាន់មានរបាយការណ៍បញ្ជាក់ពីអ្នករបួស-ស្លាប់ ឬ ការខូចខាតណាមួយឡើយ ប៉ុន្តែអាជ្ញាធរបានចេញការព្រមានដល់ពលរដ្ឋ និង អ្នកទេសចរ ដែលនៅលើកោះ ឱ្យចាកចេញឆ្ងាយពីទីតាំងបន្ទុះភ្នំភ្លើង និង ត្រៀមខ្លួនឱ្យរួចរាល់សម្រាប់ការជម្លៀសដែលនឹងអាចកើតមានឡើង។
រូបតំណាង
លោក Muhammad Wafid ប្រធានទីភ្នាក់ងារផ្នែកភូគព្ភសាស្ត្រនៅប្រទេសឥណ្ឌូនេស៊ី បានបញ្ជាក់ថា ការប្រកាសអាសន្នពីបន្ទុះភ្នំភ្លើងបានដាក់ចេញដល់កម្រិតខ្ពស់បំផុតកាលពីយប់ថ្ងៃទី ១៤ ខែតុលាកន្លងទៅ ក្រោយពិនិត្យឃើញមានការកើនឡើងការរញ្ជួយនៅបាតភ្នំដែលជាសញ្ញានៃការផ្ទុះឡើងរបស់ភ្នំភ្លើង។ លោកបានបន្ថែមទៀតថា ការជះឡើងនៃផេះខ្មួលខ្មាញ់ពីបន្ទុះភ្នំភ្លើង អាចរំខានដល់ដំណើរការហោះហើរនៅព្រលានយន្តហោះ ប្រសិនបើការផ្ទុះនៅបន្តរាលដាល។ ជាមួយគ្នានោះដែរ ខាងអាជ្ញាធរក៏បានប្រកាសផ្អាកដំណើរការជើងហោះហើរនៅព្រលានយន្តហោះក្នុងក្រុង Maumere ជាបណ្ដោះអាសន្នផងដែរ ដើម្បីធានាពីសុវត្ថិភាព៕
រូបតំណាង
ប្រភព៖ CNA
