កុំប្រហែស! នៅឥណ្ឌា កំពុងផ្ទុះឆ្លងកូវីដឡើងវិញ ដោយសារវីរុសបំប្លែងខ្លួនថ្មីចំនួន ២

ក្នុងរយៈពេល ២ ខែកន្លងមកនេះ ប្រទេសឥណ្ឌាកត់ត្រាឃើញមានការកើនឡើងករណីឆ្លងកូវីដ-១៩ ក្នុងប្រទេសគួរឱ្យកត់សម្គាល់។

ខណៈកូវីដកំពុងផ្ទុះឡើងវិញក្នុងប្រទេសនេះដែរ ខាងអ្នកជំនាញផ្នែកសុខាភិបាលគឺកំពុងតាមដានយ៉ាងជិតដិតលើវីរុសបំប្លែងខ្លួនថ្មីចំនួន ២ គឺវីរុស NB.1.8.1 និង LF.7 ដែលវីរុសទាំង ២ នេះរកឃើញកើតមាននៅរដ្ឋ Tamil Nadu និង រដ្ឋ Gujarat កាលពីខែមេសា និង ឧសភា ឆ្នាំ ២០២៥ នេះ។

គួរឱ្យដឹងដែរថា វីរុសបំប្លែងខ្លួនថ្មីទាំង ២ ខាងលើ បច្ចុប្បន្នត្រូវបានខាងអង្គការ WHO កត់ត្រាជា «វីរុសស្ថិតក្រោមការតាមដាន» ពោលគឺមានន័យថា មិនទាន់មានតឹកតាងគ្រប់គ្រាន់ណាមួយចាត់វាចូលជាវីរុសគួរឱ្យព្រួយបារម្ភនៅឡើយទេ ប៉ុន្តែពួកវានៅតែត្រូវតាមដានជាប់ជានិច្ច ព្រោះថាវាអាចមានសមត្ថភាពឆ្លងលឿន ឬគេចពីប្រព័ន្ធភាពស៊ាំបានល្អ។

គួរបញ្ជាក់ថា គិតត្រឹមចុងខែឧសភា ឆ្នាំ ២០២៥ នេះ ប្រទេសឥណ្ឌារកឃើញមានអ្នកឆ្លងកូវីដ-១៩ ប្រមាណ ២៥៧ ករណី ដោយភាគច្រើនរកឃើញនៅរដ្ឋ Kerala, Tamil Nadu, Maharashtra, Karnataka និង Delhi។ អ្នកជំងឺភាគច្រើនកើតមានអាការមិនធ្ងន់ធ្ងរឡើ និង ធ្វើការព្យាបាលតាមផ្ទះរៀងៗខ្លួន។

រដ្ឋាភិបាល និង អាជ្ញាធរសុខាភិបាល បានធ្វើការណែនាំដល់ពលរដ្ឋដែលស្ថិតក្នុងក្រុមងាយរងគ្រោះដូចជា ស្ត្រីមានផ្ទៃពោះ ក្មេងតូចៗ និង អ្នកដែលមានជំងឺប្រចាំកាយឱ្យមានការប្រុងប្រយ័ត្នខ្ពស់៕

ប្រភព៖ Kenh14