នារីម្នាក់ លាឈប់ពីការងារអូតែសប្រាក់ខែជាង ៣ រយដុល្លារ ត្រឡប់ទៅស្រុកចិញ្ចឹមជ្រូក ឥលូវរកចំណូលបានសឹងក្លាយជាសេដ្ឋី

រឿងរ៉ាវរបស់អតីតអ្នកបម្រើការលើយន្តហោះ Yang Yanxi អាយុ ២៧ ឆ្នាំ រស់នៅខេត្ត Heilongjiang ប្រទេសចិន ដែលបានសម្រេចចិត្តបោះបង់ការងាររបស់ខ្លួនរួចត្រឡប់ទៅស្រុកកំណើតដើម្បីចិញ្ចឹមជ្រូកជាអាជីពវិញរហូតរកប្រាក់បាន ២០ ម៉ឺនយ័ន (ប្រមាណ ២៧៥០៤ ដុល្លារ) ក្នុងពេលត្រឹម ២ ខែ កំពុងផ្ទុះការចាប់អារម្មណ៍យ៉ាងខ្លាំងពាសពេញបណ្ដាញសង្គម។

នាង Yang Yanxi បានកើតក្នុងត្រកូលគ្រួសារជាកសិករ ក្រោយរៀនចប់ពីសកលវិទ្យាល័យ រូបនាងបានធ្វើការជាអូតែសឱ្យក្រុមហ៊ុន Shanghai Airline រយៈពេល ៥ ឆ្នាំ។ ស្រីស្រស់រូបនេះបាននិយាយថា អំឡុងពេលក្រុមហ៊ុនជួបបញ្ហាលំបាក ប្រាក់ខែដែលនាងទទួលបានពេលខ្លះគឺត្រឹម ២៨០០ យ័ន (៣៨៥ ដុល្លារ) ប៉ុណ្ណោះ។

ថ្លែងប្រាប់សារព័ត៌មាន Jiupai News នាង Yang បាននិយាយថា នៅពេលនាងធ្វើជាអូតែសនៅសៀងហៃ នាងតែងតែសុំលុយឪពុកម្ដាយជាញឹកញាប់សម្រាប់ទិញកាបូបថ្លៃៗស្អាតៗ។ ក្រោយមក នាងក៏បានដឹងថាដើម្បីឱ្យកូនស្រីមានជីវិតរស់នៅហ៊ឺហាឡូយឆាយ ឪពុកម្ដាយនាងបានកាត់បន្ថយការចំណាយខ្លួនឯង និង ថែមជាប់បំណុលមួយចំនួនទៀតផង។

រហូតមកដល់ខែតុលា ឆ្នាំ ២០២២ ក្រោយដឹងថាម្ដាយរបស់នាងបានលាក់បាំងរឿងវះកាត់ដុំខ្លាញ់ក្រោមស្បែក (lipoma) ជាច្រើនដងមក នាង Yang ក៏បានសម្រេចចិត្តលាឈប់ពីការងាររួចវិលត្រឡប់ទៅស្រុកកំណើតវិញ។ នាងបានរៀបរាប់ការសោកស្ដាយថា៖ «ឪពុកម្ដាយខ្ញុំតែងតែប្រាប់តែរឿងល្អៗមកខ្ញុំ ប៉ុន្តែលាក់បាំងរឿងមិនល្អ។ ឥលូវ ខ្ញុំចង់នៅជាមួយពួកគាត់ និង មិនចង់ទៅណាឆ្ងាយពីផ្ទះទៀតនោះទេ»។

ក្នុងខែមេសា ឆ្នាំ ២០២៣ នាង Yang បានកាន់កាប់កសិដ្ឋានចិញ្ចឹមជ្រូកបន្តពីសាច់ញាតិ ហើយក៏ចាប់ផ្ដើមអាជីពចិញ្ចឹមជ្រូកតែម្ដង។ នាងបានចែករំលែកវីដេអូបង្ហាញពីជីវិតជាអ្នកចិញ្ចឹមជ្រូកលើបណ្ដាញសង្គមរបស់ចិនដែលទាក់ទាញអ្នកតាមដានរហូតដល់ជិត ១.២ លាននាក់។ ក្នុងវីដេអូដែលនាងបង្ហោះទាំងនោះមានបង្ហាញឱ្យឃើញរូបនាងរៀបចំចំណីជ្រូក ដាក់ចំណីឱ្យជ្រូក និង បោសសម្អាតអាចម៍ជ្រូក។ ជាមួយក្ដីបំណងចង់ឱ្យគ្រួសារមានជីវិតល្អប្រសើរ នាង Yang តែងតែតស៊ូដាក់បេះដូងលើមុខរបររបស់នាងជារៀងរាល់ថ្ងៃ។ នាងបានរៀបរាប់ទាំងរីករាយថា៖ «ឥលូវនេះ ខ្ញុំអាចរស់នៅជាមួយឪពុកម្ដាយខ្ញុំបានហើយ ខ្ញុំសប្បាយចិត្ត និង ពេញចិត្តខ្លាំងណាស់»។

គួរឱ្យដឹងថា បើតាមការបញ្ជាក់ពី Yang ផ្ទាល់ រូបនាងអាចរកចំណូលបានរហូតដល់ជាង ២០ ម៉ឺនយ័ន (ប្រមាណ ២៧៥០៤ ដុល្លារ) ក្នុងរយៈពេលត្រឹម ២ ខែនៃការចិញ្ចឹមជ្រូក លក់ជ្រូក និង សត្វចិញ្ចឹមក្នុងកសិដ្ឋានផ្សេងទៀត និង ពីការប្រើប្រាស់បណ្ដាញសង្គមរបស់នាង។ ជាមួយនឹងភាពជោគជ័យនេះ នាង Yang ក៏មានក្ដីស្រមៃចង់ពង្រីកកសិដ្ឋាននាងបន្ថែម បើកហាងឯកទេស និង សណ្ឋាគារផងដែរ៕