វីដេអូថ្មីមួយបានទម្លាយបង្ហាញឱ្យឃើញសកម្មភាពស្ដែងៗនៃយន្តហោះ CRJ900 ធ្វើការចុះចតលើផ្លូវនៅព្រលាន Toronto Pearson នាប្រទេសកាណាដា ហើយក៏ជួបគ្រោះថ្នាក់បុកធ្លាក់ផ្លូវរហូតក្រឡាប់ផ្ងារជើងឡើងលើគួរឱ្យរន្ធត់។
តាមព័ត៌មានបានឱ្យដឹងថា វីដេអូនោះត្រូវបានបញ្ចេញនៅថ្ងៃទី ១៨ ខែកុម្ភៈ ឆ្នាំ ២០២៥ កន្លងទៅ ដោយវីដេអូនេះថតបានដោយពីឡុតនៃយន្តហោះមួយផ្សេងទៀត។ តាមរយៈវីដេអូបានបង្ហាញថាយន្តហោះ CRJ900 ពេលចុះចតបានទម្លាក់កង់ហើយក៏ហោះតម្រង់ចុះមកលើផ្លូវ តែភ្លាមៗនោះយន្តហោះក៏បានផ្អៀងទៅខាងស្ដាំធ្វើឱ្យកង់បុកនឹងដីរហូតឆាបឆេះសន្ធោសន្ធៅមុនយន្តហោះបន្តផ្អៀងរហូតក្រឡាប់បះជើងឡើងលើតែម្ដង។
យ៉ាងណាមិញ ជាសំណាងល្អក្នុងហេតុការណ៍គ្រោះថ្នាក់ដ៏រន្ធត់នេះ មនុស្សទាំង ៨០ នាក់លើយន្តហោះនោះគឺមិនមាននរណាម្នាក់ប៉ះពាល់ដល់អាយុជីវិតនោះឡើយ គ្រាន់តែមួយចំនួនបានរងរបួសដូចជាគ្រេចថ្លោះ របួសក្បាល ឈឺក្បាល មានអាការភ័យស្លន់ និង មួយចំនួនទៀតក្អួតចង្អោរដោយសារហិតក្លិនសាំងយន្តហោះ។ តាមការបញ្ជាក់ពីក្រុមហ៊ុន Delta Air Lines បានឱ្យដឹងថា មនុស្សចំនួន ២១ នាក់ត្រូវបានបញ្ជូនទៅព្យាបាលនៅមន្ទីរពេទ្យ ហើយក្នុងចំណោមនោះមនុស្ស ១៩ នាក់ត្រូវគ្រូពេទ្យអនុញ្ញាតឱ្យចេញពីមន្ទីរពេទ្យហើយ៕
