យ៉ាងហោចណាស់មនុស្ស ៦១ នាក់បានស្លាប់ ក្រោយអគ្គិភ័យដ៏សន្ធោសន្ធៅមួយបានលេបត្របាក់ផ្សារទំនើបមួយកន្លែងនៅប្រទេសអ៊ីរ៉ាក់។ បើតាមចម្លើយអ្នករួចផុតអាយុជីវិតម្នាក់បាននិយាយថា ភ្លើងឆាបឆេះឡើងក្រោយម៉ាស៊ីនត្រជាក់មួយបានផ្ទុះ។
បច្ចុប្បន្នក្រុមមន្ត្រីជំនាញកំពុងតែធ្វើការស៊ើបអង្កេតលើករណីអគ្គិភ័យដែលបានឆាបឆេះផ្សារទំនើបកម្ពស់ ៦ ជាន់មួយឈ្មោះ Corniche Hypermarket Mall នាទីក្រុង Kut ដែលមនុស្សក្មេងចាស់ប្រុសស្រីកំពុងតែដើរ shopping កាលពីយប់មិញនេះ។ ភ្លើងបានឆាបឆេះដំបូងចេញពីជាន់ទី ១ មុនរាលដាលរហូតពាសពេញអគារទាំងមូល។
ក្នុងសេចក្ដីថ្លែងការណ៍របស់ក្រសួងមហាផ្ទៃប្រចាំប្រទេសអ៊ីរ៉ាក់បានរៀបរាប់ថា៖ «សោកនាដកម្មអគ្គិភ័យនេះដែរ បានឆក់យកអាយុជីវិតពលរដ្ឋស្លូតត្រង់ចំនួន ៦១ នាក់ ដោយភាគច្រើនឈ្លក់ផ្សែងស្លាប់ក្នុងបន្ទប់ទឹក ហើយក្នុងចំណោមនោះមានសាកសព ១៤ នាក់មិនទាន់ដឹងអត្តសញ្ញាណនៅឡើយទេ»៕
