ថ្មីៗនេះ មានករណីឈ្លោះទាស់ទែងដណ្ដើមកៅអីអង្គុយក្នុងឡានក្រុងសាលាមួយរវាងសិស្សថ្នាក់ទី ០៩ ចំនួន ២ នាក់ នៅក្រុង Salem រដ្ឋ Tamil Nadu ប្រទេសឥណ្ឌា បានបង្កទៅជារឿងធ្ងន់ធ្ងររហូតក្មេងប្រុសម្នាក់ត្រូវបាត់បង់ជីវិត។
តាមព័ត៌មាន India Today បានឱ្យដឹងថា សិស្សថ្នាក់ទី ០៩ ចំនួន ២ នាក់ ដោយម្នាក់ឈ្មោះ Saravanan និង ម្នាក់ទៀតឈ្មោះ Kandaguru បានឈ្លោះគ្នាដោយសារតែកៅអីអង្គុយមួយនៅលើឡានក្រុងសាលា។ ជម្លោះរវាងពួកគេទាំងពីរកាន់តែខ្លាំងទៅៗ រហូត Saravanan រុញ Kandaguru (អាយុ ១៤ ឆ្នាំ) ដួលបោកក្បាលរងរបួសធ្ងន់ធ្ងរ។
Kandaguru ត្រូវបានបញ្ជូនទៅសង្គ្រោះបន្ទាន់ភ្លាមៗផងដែរ ប៉ុន្តែដោយសារតែរបួសធ្ងន់ធ្ងរខ្លាំងពេក រូបគេត្រូវបានគ្រូពេទ្យប្រកាសថាស្លាប់នៅព្រឹកថ្ងៃបន្ទាប់។ ជុំវិញករណីនេះ ប៉ូលិសក្រុង Salem បានឃាត់ខ្លួន Saravanan ដោយខាងអាជ្ញាធរបញ្ជាក់ថា រូបគេនឹងត្រូវបង្ហាញខ្លួនចំពោះមុខក្រុមប្រឹក្សាយុត្តិធម៌ក្នុងនាមជាអនីតិជនដើម្បីបន្តនីតិវិធីច្បាប់៕
ប្រភព៖ India Today
