អ្នកវិទ្យាសាស្ត្រនៅប្រទេសចិន ថ្មីៗនេះទើបរកឃើញវីរុសកូរ៉ូណាថ្មីមួយដែលមានលទ្ធភាពចម្លងមកមនុស្សដូចនឹងកូវីដ-១៩ ដែរ តែយ៉ាងណាមិញ អ្នកជំនាញបានលើកឡើងដែរថាឥលូវមិនទាន់មានភស្តុតាងណាបញ្ជាក់ថាវីរុសថ្មីនេះអាចរាតត្បាតខ្លាំងក្លា ឬបង្កគ្រោះថ្នាក់ដល់សុខភាពដូចជំងឺកូវីដ-១៩ នៅឡើយនោះទេ។
វីរុសកូរ៉ូណាថ្មីដែលអ្នកវិទ្យាសាស្ត្រចិនរកឃើញហៅថា «HKU5-CoV-2» ត្រូវបានរកឃើញនៅក្នុងសត្វប្រចៀវ ដោយវីរុសនេះប្រើប្រាស់ប្រូតេអ៊ីនផ្នែកខាងក្រៅដូចទៅនឹង SARS-CoV-2 ដើម្បីចូលមកក្នុងកោសិការបស់មនុស្ស។ ទោះជាយ៉ាងណា អ្នកវិទ្យាសាស្ត្របានសង្កត់ធ្ងន់ថា វីរុសថ្មីនេះមិនងាយនឹងចូលរាងកាយមនុស្សបានស្រួលៗនោះទេដោយសារតែសមត្ថភាពរបស់វាមានកំណត់ក្នុងការភ្ជាប់កោសិកា រួមទាំងកត្តាផ្សេងៗទៀតដែលធ្វើឱ្យវីរុសនេះមិនទាន់បន្ស៊ាំបានជាមួយមនុស្ស។
ជាមួយគ្នានោះដែរ ខាងអ្នកវិទ្យាសាស្ត្រនៅអាមេរិកក៏បានប្រាប់ដែរថាកុំឱ្យមនុស្សគ្រប់គ្នាភ័យព្រួយបារម្ភខ្លាំងចំពោះវីរុសថ្មីនេះ ព្រោះថាបើប្រៀបធៀបទៅនឹងកាលពីកូវីដ-១៩ ផ្ទុះឆ្លងក្នុងឆ្នាំ ២០១៩ មនុស្សយើងឥលូវមានអង្គបដិប្រាណច្រើនសមល្មមស្រដៀងនឹងវីរុស SARS ដូចនេះវាអាចជួយកាត់បន្ថយហានិភ័យនៃការរាតត្បាតជាសកលបាន។
បន្ថែមពីនេះ អ្នកវិទ្យាសាស្ត្រក៏បានរកឃើញភ្លាមនូវថ្នាំអង្គបដិប្រាណ monoclonal និង ថ្នាំប្រឆាំងរោគមួយចំនួនដែលបានប្រឆាំងនឹងវីរុសនេះបាន ដែលផ្ដល់ក្ដីសង្ឃឹមសម្រាប់វិធានការការពារជំងឺដ៏មានប្រសិទ្ធភាពនាពេលអនាគត៕
ប្រភព៖ Kenh14
