កាសែត New Straits Times បានចេញផ្សាយករណីរន្ធត់មួយនៅប្រទេសម៉ាឡេស៊ីដែលបានកើតឡើងកាលពីរសៀលថ្ងៃទី ២៥ ខែមីនា ឆ្នាំ ២០២៥ (ពេលវេលាក្នុងតំបន់) ដោយស្ត្រីម្នាក់ឈ្មោះ Azuraini Yazid អាយុ ៤៣ ឆ្នាំ ខណៈកំពុងដើរតាមផ្លូវសុខៗស្រាប់តែត្រូវបានកង់មួយគ្រឿងធ្លាក់ពីជាន់ទី ១២ មកចំក្បាលមួយទំហឹងរហូតរងរបួសធ្ងន់ធ្ងរ។
តាមព័ត៌មានបានឱ្យដឹងថា ស្ត្រីជាជនរងគ្រោះក្រោយត្រូវកង់ធ្លាក់ចំបានដួលសន្លប់បាត់មាត់បាត់ក រួមទាំងរងរបួសក្បាលហូរឈាមដាបពេញដី។ ភ្លាមៗ រូបនាងត្រូវបានបញ្ជូនទៅព្យាបាលនៅមន្ទីរពេទ្យ ដោយតាមឱ្យដឹងស្ថានភាពគឺនឹងនមិនប៉ះពាល់ដល់អាយុជីវិតនោះឡើយ ប៉ុន្តែក្រុមគ្រូពេទ្យនៅត្រូវការតាមដានបន្ត។
តាមការបញ្ជាក់ពីស្វាមីជនរងគ្រោះបានឱ្យដឹងបន្ថែមថា ប្រពន្ធរបស់លោកត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ដោយក្បាលត្រូវដេរចំនួន ៥ ថ្នេរ ហើយចំពោះសុខភាពវិញគឺនឹងនធម្មតា។ លោកបានទម្លាយទៀតថា លោកបាននិយាយជាមួយគ្រួសារដែលជាម្ចាស់កង់នោះហើយ ដោយពួកគេទទួលស្គាល់ថាកង់ជារបស់កូនប្រុសខ្លួន ប៉ុន្តែត្រូវបានបោះទម្លាក់ចុះក្រោមដោយអ្នកផ្សេង។ បច្ចុប្បន្ន ខាងអាជ្ញាធរកំពុងស៊ើបអង្កេតស្វែងរកជនបង្កមកចាត់ការតាមផ្លូវច្បាប់៕
