ថ្ងៃ ១៦ មេសា ប្រទេសធំៗដល់ទៅ ៣ រងគ្រោះរញ្ជួយដីដូចគ្នា ខ្លះប៉ះពាល់ខ្លាំង ចំណែកខ្លះទៀតក៏ស្រាល

កាលពីព្រឹកថ្ងៃទី ១៦ មេសា ឆ្នាំ ២០២៥ កន្លងទៅ នាយកដ្ឋានឧតុនិយមប្រចាំប្រទេសថៃបានប្រកាសថា មានគ្រោះរញ្ជួយដីកម្រិត ៤.១ រ៉ិចទ័រ បានកើតមានឡើងនៅប្រទេសមីយ៉ាន់ម៉ា បង្កការរញ្ជួយនៅតាមតំបន់ព្រំដែនមីយ៉ាន់ម៉ា-ថៃ។

គ្រោះរញ្ជួយដីនេះដែរកើតមានក្នុងជម្រៅប្រមាណ ១៥ គីឡូម៉ែត្រ ដោយចំណុចកណ្ដាលស្ថិតនៅចម្ងាយ ១៦០ គីឡូម៉ែត្រភាគពាយ័ព្យខេត្ត Mae Hong ប្រទេសថៃ។ ពលរដ្ឋនៅតាមតំបន់ព្រំដែនគឺទទួលអារម្មណ៍រញ្ជួយ ប៉ុន្តែមិនមានសេចក្ដីរាយការណ៍ណាបញ្ជាក់ពីការខូចខាត ឬរងគ្រោះដល់អាយុជីវិតនោះឡើយ។

ជាមួយគ្នានោះដែរ ខាងទីភ្នាក់ងារស្ទាបស្ទង់ភូមិសាស្ត្រអាមេរិក (USGS) បានបង្ហាញដែរថា នៅភាគខាងត្បូងប្រទេសហ្វីលីពីនក៏បានរងគ្រោះរញ្ជួយដីដូចគ្នាជាមួយកម្រិត ៥.៦ រ៉ិចទ័រ ដោយគ្រោះរញ្ជួយដីនេះដែរកើតមានឡើងនៅកោះ Mindanao ក្នុងជម្រៅប្រមាណ ៣០ គីឡូម៉ែត្រ។ គ្រោះរញ្ជួយដីនេះកំណត់ថាជាគ្រោះរញ្ជួយដីកម្រិតខ្លាំង ប៉ុន្តែដោយសារតែវាកើតឡើងមិនក្នុងរយៈពេលយូរ ដូច្នេះមិនមានេបាយការណ៍បញ្ជាក់ពីការខូចខាត ឬករណីស្លាប់នោះឡើយ។

ដោយឡែក ក្នុងថ្ងៃទី ១៦ ខែមេសា ជាមួយគ្នានេះ នៅតំបន់ Hindu Kush នៃប្រទេសអាហ្វហ្គានីស្ថាន ក៏រងគ្រោះរញ្ជួយដីផងដែរក្នុងកម្រិត ៥.៩ រ៉ិចទ័រ ដោយការរញ្ជួយកើតមានដល់ក្រុង New Delhi និង បណ្ដាតំបន់នានាផ្សេងទៀតក្នុងប្រទេសឥណ្ឌាទៀតផង។ គ្រោះរញ្ជួយដីនេះ វាយប្រហារក្នុងជម្រៅ ៧៥ គីឡូម៉ែត្រ ដោយខាងមជ្ឈមណ្ឌលជាតិផ្នែកគ្រោះរញ្ជួយដីប្រចាំប្រទេសឥណ្ឌាបានបញ្ជាក់ថា នេះចាត់ទុកជាគ្រោះរញ្ជួយដីដ៏ខ្លាំងក្លាមួយដែលអាចបង្កជាការខូចខាតធ្ងន់ធ្ងរ ជាពិសេសទីតាំងនៅក្បែរចំណុចកណ្ដាលនៃការរញ្ជួយដី។ យ៉ាងណាមិញ មកទល់ពេលនេះនៅមិនទាន់មានរបាយការណ៍បញ្ជាក់ពីករណីស្លាប់ និង ការខូចខាតណាមួយឡើយ៕

ប្រភព៖ Kenh14