Micro-dramas ដែលជារឿងភាគខ្លីៗថតបង្ហោះតាមបណ្ដាញសង្គមក្នុងប្រទេសចិន បច្ចុប្បន្នកំពុងតែផ្ទុះប្រជាប្រិយភាពខ្លាំងរហូតធ្វើឱ្យតារាសម្ដែងក្នុងរឿងខ្លីៗទាំងនេះមួយចំនួនធំក៏ទទួលភាពល្បីល្បាញមិនចាញ់តារាសម្ដែងតាមផលិតកម្មធំៗផងដែរ។
ក្នុងចំណោមនោះ តារាប្រុស Leo Wang Yiran ដែលបានបង្ហាញខ្លួនសម្ដែងក្នុងរឿងខ្លីៗជិត ៦០ រឿងចាប់តាំងពីឆ្នាំ ២០២៣ មកនេះ ក៏ទទួលបានការគាំទ្រខ្លាំងរហូតជាប់ងារជា «រាជបុត្រប្រចាំរឿង micro-dramas» ទៀតផង។ តារាប្រុសវ័យ ២៦ ឆ្នាំរូបនេះបានឆក់យកបេះដូងទស្សនិកជនក្នុងតួសម្ដែងជា CEOs និង តួប្រុសដ៏មានមន្តស្នេហ៍ ជាពិសេសក្នុងរឿង «If Tears Remember You» និង រឿង «30 000 Feet of Secret Love»។
យ៉ាងណាមិញ ងាកមកជីវិតក្រៅសាច់រឿងរបស់តារាសម្ដែងប្រុសរូបសង្ហានេះ គឺមើលទៅមិនល្អមិនរលូនដូចជាក្នុងសាច់រឿងនោះឡើយ។ ជាក់ស្ដែង ថ្មីៗនេះ តារាប្រុស Leo បានក្លាយជាប្រធានបទក្ដៅគគុកក្នុងបណ្ដាញសង្គមប្រទេសចិន ក្រោយអតីតមិត្តស្រីរបស់លោកចេញមកប្រកាសពីការបែកគ្នាជាសាធារណៈ និង ថែមទាំងហែកហួរចរិតមិនល្អរបស់លោកមួយចំនួនផងដែរ ធ្វើឱ្យមហាជនជាច្រើនផ្ទុះការចាប់អារម្មណ៍ជាខ្លាំង។
ក្នុងការបង្ហោះរបស់អតីតមិត្តស្រីតារាប្រុសរូបនេះបានសរសេររៀបរាប់ថា៖ «ដើម្បីជៀសវាងការយល់ច្រឡំមួយចំនួន ខ្ញុំមកទីនេះដើម្បីប្រកាសជាផ្លូវការថា ទំនាក់ទំនងស្នេហាខ្ញុំពីមុនត្រូវបានបញ្ចប់ហើយ សូមកុំមករំខានខ្ញុំទៀតអី»។ នៅពេលមហាជនងឿងឆ្ងល់ និង សួរអំពីមូលហេតុ នាងក៏បានតបបន្ថែមថា ៖ «ពួកយើងគឺមិនស័ក្ដិសមជាមួយគ្នាឡើយ។ នៅជាមួយគាត់គឺស្ត្រេសខ្លាំងណាស់ ខ្ញុំទ្រាំទៀតមិនបានទេ»។
នៅពេលមហាជនជីកសួរបន្ថែមថាតើ Leo ខ្វះខាតអ្វីខ្លះ នាងក៏បានតបវិញថា៖ «គាត់គឺញៀននឹងអ៊ីនធឺណែតខ្លាំង ហើយផោមញឹកខ្លាំងឯក្លិនក៏អាក្រក់ទៀត»។ បន្ថែមពីនេះ នាងក៏រៀបរាប់ដែរថា ក្រុមគ្រួសារនាងរកឃើញថា ពួកគេទាំងពីរគឺមិនត្រូវគ្នាឡើយ បើតាមក្បួនប៉ាជឺ (bazi) ហើយនេះក៏ជាចំណុចមួយធ្វើឱ្យចំណងស្នេហ៍ពួកគេឈានដល់ថ្ងៃបញ្ចប់ដែរ៕
ប្រភព៖ 8days
