រយៈពេលត្រឹមមួយសប្ដាហ៍ក្រោយការបុកគ្នារវាងយន្តហោះដឹកអ្នកដំណើរ និង ឧទ្ធម្ភាគចក្រយោធា Black Hawk ក្បែរ Washington DC ដែលឆក់យកអាយុជីវិតមនុស្សអស់ ៦៧ នាក់នោះមក ស្រាប់តែមានហេតុការណ៍គ្រោះថ្នាក់ថ្មីមួយទៀតហើយកើតមានឡើងនៅសហរដ្ឋអាមេរិក ដោយយន្តហោះចំនួន ២ គ្រឿង មួយជារបស់ Japan Airlines និង មួយទៀតជារបស់ Delta Airlines បានប៉ះទង្គិចគ្នាលើផ្លូវរត់នាព្រលានយន្តហោះនាក្រុង Seattle។
ប្រកាសបញ្ជាក់លើបណ្ដាញសង្គម X កាលពីថ្ងៃទី ០៥ ខែកុម្ភៈ ឆ្នាំ ២០២៥ កន្លងទៅ ព្រលានយន្តហោះអន្តរជាតិ Seattle-Tacoma បានឱ្យដឹងថា ក្រុមពន្លត់អគ្គិភ័យ ប៉ូលិស រួមទាំងខាងក្រុមការងារនៅព្រលានយន្តហោះបានធ្វើការឆ្លើយតបភ្លាមៗជុំវិញគ្រោះថ្នាក់មួយនេះ។ ការប៉ះទង្គិចគ្នាបានលើផ្លូវរត់ ដោយយន្តហោះរបស់ Japan Airlines ខណៈកំពុងបើកលើផ្លូវក៏បានទៅបុកជាមួយនឹងកន្ទុយរបស់យន្តហោះ Delta Airlines ដែលកំពុចត។ ចំពោះមូលហេតុបង្កឱ្យមានការប៉ះទង្គិចនេះ ខាងព្រលានកំពុងស៊ើបអង្កេតនៅឡើយ។
ចំពោះសុវត្ថិភាពអ្នកដំណើរវិញ ខាងព្រលានយន្តហោះបានរៀបរាប់ថា៖ «ជាការជូនដំណឹងចុងក្រោយ រាល់អ្នកដំណើរទាំងអស់លើជើងហោះហើរ Japan Airlines Flight 68 និង យន្តហោះ Delta Airlines Flight 1921 គឺបានជម្លៀសចេញពីយន្តហោះដោយសុវត្ថិភាព ដោយគ្មាននរណាម្នាក់រងរបួសនោះឡើយ។ ខាងជើងហោះហើរកំពុងធ្វើការរៀបចំពេលវេលាការហោះហើរដ៏សមស្របមួយសម្រាប់អ្នកដំណើរទាំងអស់នោះផងដែរ។ ជាមួយគ្នានេះ ខាងក្រុមការងាររបស់ព្រលាននឹងធ្វើការផ្លាស់យន្តហោះទាំងពីរគ្រឿងនោះចេញពីផ្លូវរត់»។
ក្នុងនោះដែរ ព្រលានយន្តហោះ Seattle-Tacoma ក៏បានធ្វើការណែនាំដល់អ្នកដំណើរផ្សេងទៀតឱ្យធ្វើការពិនិត្យជាមួយខាងក្រុមហ៊ុនជើងហោះហើរដែលពួកគេជិះ ថាពួកគេមានជើងហោះហើរក្នុងថ្ងៃតែមួយនោះដែរឬអត់។ បើតាមការបញ្ជាក់ពីខាងព្រលាន ការប៉ះទង្គិចគ្នានេះគឺកើតមានឡើងលើផ្លូវយន្តហោះរត់ ដូច្នេះការប៉ះពាល់ដល់ប្រតិបត្តិការទូទៅក្នុងព្រលានគឺជៀសមិនផុតនោះឡើយ៕
