ជាដំណឹងមួយដ៏រំភើបសម្រាប់អ្នកគាំទ្រក្រុមតារាចម្រៀងកូរ៉េ BTS ដោយនៅព្រឹកថ្ងៃទី ១១ ខែមិថុនា ឆ្នាំ ២០២៥ នេះ សមាជិកក្រុមចំនួន ២ រូបគឺតារាចម្រៀងប្រុស Jungkook និង Jimin នៅទីបំផុតបានបញ្ចប់បេសកកម្មរបស់ខ្លួនរួចរាល់ ក្រោយចូលបំពេញកាត្វកិច្ចយោធាអស់រយៈពេលជិត ២ ឆ្នាំមកនេះ។ ដូច្នេះហើយ ពួកគេនឹងវិលត្រឡប់មកកាន់វិស័យចម្រៀងវិញ ជួបជុំជាមួយនឹងសមាជិកដទៃទៀតក្នុងក្រុម បន្តការងារឡើងវិញដើម្បីបម្រើអារម្មណ៍អ្នកគាំទ្រជាថ្មី។
ក្រោយចំណាយពេលមួយរយៈធំ ញ៉ាំតែអាហាររបស់យោធា Jungkook និង Jimin គឺឃើញថាមានការឡើងសាច់តិចតួច តែយ៉ាងណាមិញ រាងកាយរបស់កំពូលតារាចម្រៀងទាំងពីរគឺកាន់តែសង្ហា មាំទាំ គួរឱ្យស្រឡាញ់ថែមទៀត។ មិនត្រឹមតែរូបរាងប៉ុណ្ណោះទេ ដែល Jungkook និង Jimin ទទួលបានការសរសើរពីអ្នកគាំទ្រ សូម្បីតែស្បែកមុខរបស់ពួកគេក៏ត្រូវអ្នកគាំទ្រលាន់មាត់ដូចគ្នា ថាស្បែករបស់ពួកគេគឺម៉ត់រលោង សចែងចាំងខ្លាំង។
គួររំឭកថា តារាចម្រៀង Jungkook និង Jimin បានចូលបម្រើកងទ័ពជាមួយគ្នាកាលពីខែធ្នូ ឆ្នាំ ២០២៣ កន្លងទៅ។ ក្នុងចំណោមសមាជិកទាំងអស់របស់ក្រុមចម្រៀង BTS តារាចម្រៀង Jin បានបញ្ចប់កាតព្វកិច្ចបម្រើកងទ័ពមុនគេកាលពីខែមិថុនា ឆ្នាំ ២០២៤ កន្លងទៅ។ បន្ទាប់មក តារាចម្រៀង RM និង V បានបញ្ចប់ភារកិច្ចកាលពីថ្ងៃទី ១០ ខែមិថុនា កន្លងទៅនេះ ខណៈ Suga នឹងបញ្ចប់កាត្វកិច្ចខ្លួននៅថ្ងៃទី ២១ ខែមិថុនា ខាងមុខនេះ។ ស្របពេល សមាជិកនីមួយៗបានបំពេញកាតព្វកិច្ចជូនជាតិរួចរាល់ម្ដងម្នាក់ៗ ក្រុម BTS រំពឹងថានឹងត្រឡប់មកបម្រើអារម្មណ៍អ្នកគាំទ្ររបស់ពួកគេវិញជាក្រុមទាំងមូលនៅក្នុងឆ្នាំ ២០២៥ នេះ៕
ប្រភព៖ Kenh14
