ភ្នំភ្លើង Lewotobi Lakilaki ដែលមានទីតាំងស្ថិតនៅខេត្ត East Nusa Tenggara ប្រទេសឥណ្ឌូនេស៊ី បានផ្ទុះឡើងចំនួន ៨ ដងជាប់គ្នាកាលពីថ្ងៃទី ១៨ ខែឧសភា ឆ្នាំ ២០២៥ បាចសាចជះផ្សែង និង ផេះខ្មួលខ្មាញ់ឡើងលើអាកាសក្នុងកម្ពស់ពី ៣ ពាន់ទៅ ៥៥០០ ម៉ែត្រ។ កម្រិតផ្ទុះខ្លាំងក្លាជាងគេបំផុតត្រូវបានកត់ត្រានៅវេលាម៉ោង ២ និង ០៥ នាទីរសៀល ដែលបានបាចសាចផេះទៅទីតាំងជាច្រើន។
ការផ្ទុះឡើងជាប់ៗគ្នាជិត ១០ ដងនេះហើយ បានធ្វើឱ្យខាងមជ្ឈមណ្ឌលគ្រប់គ្រងគ្រោះមហន្តរាយភូមិសាស្ត្រ និង បន្ទុះភ្នំភ្លើងប្រចាំប្រទេសឥណ្ឌូនេស៊ី ត្រូវដាក់ចេញការប្រកាសអាសន្នឡើងដល់កម្រិតខ្ពស់ជាងគេបំផុត។ គួរឱ្យដឹងផងដែរថា ភ្នំភ្លើង Lewotobi Laki-laki នៅបន្តផ្ទុះនៅឡើយនៅព្រឹកថ្ងៃទី ១៩ ខែឧសភា ឆ្នាំ ២០២៥ នេះ (ពេលវេលាក្នុងតំបន់) ដោយបានជះផេះប្រមាណ ១២០០ ម៉ែត្រទៅលើអាកាស។
ខាងអាជ្ញាធរ បានស្នើឱ្យពលរដ្ឋនៅឆ្ងាយពីទីតាំងភ្នំភ្លើងប្រមាណជា ៦ គីឡូម៉ែត្រ និង ព្រមានពីហានិភ័យនៃការបាក់ល្បាប់ដីប្រសិនបើមានភ្លៀងធ្លាក់ខ្លាំង។ ជាមួយគ្នានោះដែរ ពលរដ្ឋដែលរស់នៅក្នុងតំបន់ដែលប៉ះពាល់ដោយផេះភ្នំភ្លើង ក៏ត្រូវបានណែនាំឱ្យពាក់ម៉ាស់ការពារផ្លូវដង្ហើមផងដែរ៕
