កន្លះឆ្នាំចែកទ្រព្យគ្នាអត់ដាច់! ប្ដីប្រពន្ធមួយគូ លែងលះគ្នាមិនដាច់ស្រេច ព្រោះតែមាន់ទា ៥៣ ក្បាល

រយៈពេលកន្លះឆ្នាំ ប្ដីប្រពន្ធមួយគូនៅខេត្ត Sichuan ប្រទេសចិន នៅត្រាំត្រែងលែងលះគ្នាមិនដាច់ស្រេចសោះ ក៏ព្រោះតែចរចាមិនត្រូវរ៉ូវគ្នារឿងបែងចែកមាន់ទាដែលពួកគេចិញ្ចឹមរួមគ្នាចំនួន ៥៣ ក្បាល។

ករណីដ៏គួរឱ្យហួសចិត្តនេះដែរ បានកើតឡើងលើបុរសម្នាក់ឈ្មោះ Yang ដែលបានដាក់ពាក្យលែងលះជាមួយប្រពន្ធឈ្មោះ Tu នៅតុលាការក្រុង Daishi ខេត្ត Sichuan ប្រទេសចិន កាលពីដើមខែឧសភា ឆ្នាំ ២០២៥ កន្លទៅ។ ប្ដីប្រពន្ធពួកគេគឺជាកសិករ និង គ្មានទ្រព្យសម្បត្តិរួមអ្វីក្រៅពីផ្ទះដែលសង់ឡើងរួមរស់ជាមួយគ្នានោះទេ ប៉ុន្តែបណ្ដឹងលែងលះមួយករណីនេះបែរជាត្រូវជាប់គាំងបញ្ចប់មិនរួច ក៏ព្រោះតែការបែងចែកមាន់ទាមិនសមចិត្តគ្នា។

តាមការរៀបរាប់ពីខាងចៅក្រមបានឱ្យដឹងថា លោក Yang និង ភរិយាឈ្មោះ Tu គឺមិនបានទាស់ទែងគ្នាលើចំនួនមាន់ទាដែលចង់បាននោះទេ ប៉ុន្តែពួកគេទាំងពីរអះអាងថាសុទ្ធតែបានដាក់ចិត្តកាយមើលថែទាំសត្វចិញ្ចឹមទាំងនោះដិតដល់រៀងៗខ្លួន។ ជាក់ស្ដែង ស្ត្រីជាប្រពន្ធបានអះអាងថា នាងជាអ្នកចិញ្ចឹមសត្វស្លាបទាំងនោះ ដូច្នេះនាងគួរតែបានចំណែកច្រើនជាង ខណៈបុរសជាប្ដីស្នើសុំបែងចែកឱ្យស្មើគ្នា។

ចៅក្រម លើកគំនិតដោយចង់បែងចែកឱ្យស្មើភាពគ្នា ដោយសត្វក្ងាន ២២ ក្បាលបែងចែកតាមទំហំ (៣ ធំ និង ៨ តូច) ខណៈសត្វទា ២ ក្បាល ចែកឱ្យម្នាក់មួយ តែយ៉ាងណារឿងដែលឈឺក្បាលគឺសត្វមាន់ចំនួន ២៩ ក្បាល ដែលជាចំនួនសេស មិនដឹងថាត្រូវបែងចែកមួយក្បាលចុងក្រោយទៅឱ្យខាងណា។ ទោះជាយ៉ាងណា ជាចុងក្រោយ ខាងចៅក្រមបានបំផុសគំនិតឱ្យភាគីទាំងសងខាងប៉ះប៉ូវគ្នានូវមាន់មួយក្បាលចុងក្រោយនេះទៅតាមតម្លៃទីផ្សារ ឬក៏សម្លាប់វាយកមកធ្វើម្ហូបញ៉ាំលាគ្នាលើកចុងក្រោយទៅ ហើយពួកគេក៏យល់ព្រមតាម ទើបករណីលែងលះមួយនេះបានបញ្ចប់ទៅដោយជោគជ័យ៕