ជាវិធីសាស្ត្រកាត់បន្ថយការខ្ជះខ្ជាយក្រដាសអនាម័យ ប្រទេសចិនបានបញ្ចេញប្រព័ន្ធបង្គន់ឆ្លាតវៃ ដែលបង្ខំឱ្យអ្នកប្រើប្រាស់ត្រូវស្កេនមើលពាណិជ្ជកម្ម ឬក៏បង់ប្រាក់ ដើម្បីអាចទាញយកក្រដាសអនាម័យបាន។
នៅតាមបង្គន់សាធារណៈក្នុងប្រទេសចិន ការដំឡើងប្រព័ន្ធបង្គន់ឆ្លាតវៃថ្មីមួយបានក្លាយជាប្រធានបទដ៏ក្ដៅគគុកនៅតាមបណ្ដាញសង្គម។ ជាក់ស្ដែង តាមរយៈវីដេអូមួយចំនួនដែលបានបង្ហោះ បានបង្ហាញពីប្រព័ន្ធឆ្លាតវៃដែលបំពាក់លើប្រអប់ក្រដាសអនាម័យ ដោយអនុញ្ញាតឱ្យអ្នកប្រើប្រាស់ទាញយកក្រដាសបាន លុះត្រាតែស្កេនមើលពាណិជ្ជកម្ម ឬក៏បង់ប្រាក់។
ប្រព័ន្ធនេះដែរច្នៃមកឡើង ដើម្បីឆ្លើយតបនឹងបញ្ហាចម្បងនៃការខ្ជះខ្ជាយក្នុងការប្រើប្រាស់ក្រដាសអនាម័យ។ តាមការបញ្ជាក់ពីខាងមន្ត្រីក្នុងប្រទេស ពលរដ្ឋជាច្រើនបានខ្ជះខ្ជាយប្រើប្រាស់ក្រដាសអនាម័យច្រើនហួសហេតុ បង្កជាការខាតបង់ខ្លាំងក្លា។ ជាមួយនឹងប្រព័ន្ធថ្មីនេះ អ្នកប្រើប្រាស់តម្រូវឱ្យមើលពាណិជ្ជកម្ម ឬបង់ប្រាក់ ០.៥ យ័ន (ប្រមាណ ០.០៧ ដុល្លារ) ដើម្បីទទួលបានក្រដាសមួយចំនួន។
យ៉ាងណាមិញ ការដំឡើងប្រព័ន្ធថ្មីនេះដែរទទួលរងមតិប្រតិកម្មជាច្រើនពីអ្នកប្រើប្រាស់។ មហាជនជាច្រើនលើកឡើងថា ប្រព័ន្ធនេះមានការរំខាន ហើយអ្វីដែលធ្ងន់ធ្ងរជាងនេះនោះ គឺអ្នកប្រើប្រាស់អាចជួបប្រទះបញ្ហាធំ ប្រសិនបើទូរស័ព្ទរបស់ពួកគេអស់ថ្មមិនអាចស្កេនយកក្រដាសបាន៕
ប្រភព៖ Kenh14
