កាលពីពេលថ្មីៗកន្លងទៅនេះ សារព័ត៌មាន South China Morning Post បានចេញផ្សាយថា នៅតំបន់ Shangri-La ខេត្ត Yunnan ភាគនិរតីប្រទេសចិន មានស្ត្រីវ័យ ២៧ ឆ្នាំម្នាក់ ដែលគេស្គាល់តាមឈ្មោះចំនួន ២ ថា Dolma និង Yongzong។
នាង Yongzong គឺមកពីតំបន់ Deqin នៃដែនដីស្វ័យ័តទីបេ Diqing ខេត្ត Yunna បើជិះពី Shangri-La ចាយពេលប្រមាណជា ៤ ម៉ោង។ នាងមកពីគ្រួសារកសិករ បានចាប់ផ្ដើមចូលធ្វើការក្រោយបញ្ចប់ការសិក្សាកាលពី ៣ ឆ្នាំមុន។ នាងធ្វើការជាអ្នកបម្រើ ដោយក្រោយមកក៏ដំឡើងឱ្យក្លាយជាអ្នកសម្ដែង ជំនាញខាងរាំ និង ច្រៀង។
នៅពេលវីដេអូសម្ដែងរបស់នាងត្រូវបានចែកចាយលើបណ្ដាញសង្គម នាង Yongzong ក៏បានទាក់ចិត្តទាក់ភ្នែកមហាជនជាច្រើន ដោយពួកគេនាំគ្នាចូលបញ្ចេញមតិថា Yongzong គឺស្រស់ស្អាត និង មានមុខមាត់ស្រដៀងទៅនឹងកំពូលតារាសម្ដែងស្រីកូរ៉េ Song Hye Kyo ខ្លាំង។ ចាប់តាំងពីពេលនោះមក នាង Yongzong ត្រូវបានគេដាក់រហស្សនាមឱ្យថា Song Hye Kyo តំបន់ Deqin, Song Hye Kyo ទីបេ ឬ Song Hye Kyo ចិន ជាដើម។
ការផ្ទុះប្រជាប្រិយភាពភ្លាមៗរបស់ Yongzong នេះដែរ បានជួយឱ្យមុខជំនួញនៅកន្លែងនាងធ្វើការហក់ឡើងគួរឱ្យកត់សម្គាល់។ មនុស្សជាច្រើនមកពីបណ្ដាខេត្តនានានៅប្រទេសចិន បាននាំគ្នាទៅតំបន់ Shangri-La ដើម្បីបានជួបនាង ហើយក្នុងចំណោមអ្នកគាំទ្រទាំងនោះក៏មានអ្នកទេសចរមកពីប្រទេសកូរ៉េផងដែរ៕
